Aizawl: Gauhati High Court Chief Justice, Justice Vijay Bishnoy-a’n District Jail Lawngtlai a tlawh a, mi tin tana rorelna dik awm turin National, State leh District-a Legal Services Authority ten kawng hrang hranga hma an lak thin thu a sawi.
Mizoram State Legal Services Authority (SLSA) buatsaihin Inrinni khan Lawngtlai District Jail-ah hian jail tang zingah kum upa te zinga tihdam theih loh natna benvawn neite tan a bika ruahmanna siam leh jail tangten thiam thil an neih tihhmasawn tura hmalakna chungchang ‘Special Campaign for Old Prisoners & Terminally Ill Prisoners & Skill Development’ tia vuah zirhona buatsaih a ni a. He inkhawmah hian Justice Bishnoy-a chuan India ram chhunga jail zawng zawngah ‘Skill Development and Enhancement Programme’ kalpui a nih tawh thu a sawi.
Chief Justice Bishnoy chuan ‘Skill Development and Ehancement Programme’-in a tum ber chu jail tangten eizawnna tlak thiamna an neih bakah jail atanga an chhuah hun a nunphung pangngaia an khawsak theihna tur a nih thu a sawi a. Hei bakah ‘Special Campaign for Old Prisoners & Terminally Ill Prisoners’ a kalpui chhan ber chu kum 70 leh a chung lam bakah tihdam theih loh natna neite jail atanga a hma lama an chhuah theih dan kawng ngaihtuahpui a nih thu a sawi a. Jail atanga chhuah nghal theih an nih loh pawhin an dikna chanvo zah sak leh duat taka enkawl hi a tum ber a nih thu a sawi bawk.
Justice Bishnoy chuan ‘Special Campaign for Old Prisoners & Terminally Ill Prisoners’ hnuaiah hian State leh District level-ah Team din vek tawh a nih thu a sawi a. Kum 70 leh a chunglam bakah tihdam theihloh natna veite zawn chhuah bakah a tul anga hmalak mek a nih thu a sawi.
Justice Bishnoy chuan District Jail, Lawngtlai bikah ‘Old Prisoners & Terminally Ill Prisoners’ an awm lo chu lawmawm a tih thu a sawi a. Jail chu mi sual dahkhawmna hmun anga ngai lo tur leh nungchang siam thatna hmun pawimawh tak, khua leh tui tha taka siamna hmun ang zawng a thlir thiam turin a chah a ni.
District Jail, Lawngtlai hi Jail tang mi 90 awm theihna niin, tun dinhmunah Jail tang mi 36 an awm mek a ni.