Jammu & Kashmir a Rajouri district chhungah thawhtanni khan sipaite chuan rahpuah bomb rap palhin, sipai parukin hliam na tak an tuar.
Official-te sawi danin sipaite hi patrol duty-a chhuak niin, zing dar 10:45 velah rah puah bomb hi an rap palh a, hliam na tak an tawrh phah ta a ni.
Hliam tuarte hi rang taka damdawi in panpui nghal niin, an dinhmun a that thu sawi an ni bawk.
Anti-infiltration obstacle system kalpui mek zingah Line of Control bawr velah rahpuah bomb a awm nia sawi a ni a, hei hi sipaite chuan endikin, tihchhiat hna an thawk mek a, thawhtannia rahpuah bomb rap palh tate pawh hi hemi buaipui mektute hi an ni tih sipaite chuan an sawi.
Tun hnai hian J&K hmun thenkhat bakah, ramdang nena inrina bawr velah helho chetna a nasa leh deuh nia sawi niin, LoC ah pawh duty dah ngawrh hle a ni a, sipaite chuan rahpuah bomb sut hna an thawk nasa hle nia sawi a ni bawk.