Aizawl: Viksit Bharat Young Leaders Dialogue 2025, January 10–12, 2025 chhunga Bharat Mandapam, New Delhi-a neihah Grace Lalrinpari Hauzel, Pachhunga University College history department-a fourth-semester zirlai chu Youth Representative of India atana thlan zingah a tel.
Thalai, ram hruaitu ni thei tura beiseiawmte inkhawmpui Viksit Bharat Young Leaders Dialogue 2025-a telte hi state hrang hrangin anmahni state theuha inelna hrang hrang buatsaih a an thlan te an ni a, a team angin inelna hrang hrangah an tel a, mimal-tin pawh an tih that dan uluk taka en a ni. Grace Lalrinpari hi inelna hrang hranga ti tha ber te zinga mi niin India ram thangtharte aiawh tlaka ngaih a ni. Prime Minister Narendra Modi telna inkhawmah thu sawi tir a nih bakah dawhkan khatah chawchhun kilhotir a ni bawk.
Viksit Bharat Young Leaders Dialogue hi tunhma kum 25 chhung zeta National Youth Festival an lo hman thin thlakna a ni a, Prime Minister Narendra Modi-a’n nikum India Independence Day-a a sawi – thalai political party-a telna nei lo mi nuai khatte politics-a hman tangkai a, developed India (Viksit India) atana an ngaihdan te an thawh ve theihna tur remchang siamsak a tih nena inzula ruahman a ni.
Prime minister hian he thalai inkhawmpui hi telpuiin zalen taka inkawmna hun tha leh remchang a awm theihna turin chawchhun a kilpui nghe nghe a ni. Thalaite pawhin an ngaihdan te, an duhdan leh a taka an tawnte tlang takin an sawi a. Hei hi ram rorelna kawnga thalaite inhnamhnawih tir leh mawhphurhna nei nia inhria a, neitu chan chantir tumna pakhat a ni.
Mizoram atang hian he huna tel turin team li an kal a, an vaiin mi 12 niin chungzinga paruk chu Pachhunga University College zirlai an ni.