Aizawl: BJP Mizoram chuan nimin khan an pisa-ah chawlhkar thar inhlanna leh ‘Samvidhan Gaurav Abhiyan’ danpui chungchang zirhona an nei.
State Vice President Vanupa Zathang chuan India danpui chungchang a sawi hnuah, he hun kaihruaitu, Samvidhan Gaurav Abhiyaan Convener JB Rualchhinga ni bawk chuan thu sawiin, Dr. Bhimrao Ramji Ambedkar chuan caste-base inthliar hranna hi a duh lo hle a, hnam hnuaihnung zawkte dinhmun chawisan hi a thupui ber lian berte zinga mi tih sawiin, “Dr. BR Ambedkar chuan Congress party-in politics an khelh thin danah lungawi lohna neiin, casteism chungchangah Congress an inrawlh nasat thin avangin a sawisel fo thin a ni,” a ti.
Article 370 nuaibo a nih hnuah dan intluktlanna Jammu & Kashmir-ah hman a nih tak avangin Dr BR Ambekar duhthusam a nih ngei a rinawm tih sawiin JB Rualchhinga chuan, “CAA hian hnam hnuaihnung zawk dalit leh tribal-te dinhmun a siam that avangin, hei hi a duh dan a ni bawk,” tiin, Congress hian Article 356 a tihkhawloh avangin India ramah emergency puan a lo ngaih phah tawh tih a sawi.
JB Rualchhinga chuan OBC, ST/SC te tana dan siam that leh reservation siamte hi Dr BR Ambedkar hmathlir hman chhoh mek zel a nih tih a sawi a. BJP chuan hmeichhiate tana 33% reservation hman ni se an tih pawh hi India ram chu politics-ah a kal that nan leh chanvo tha mi tinin an neih theih nan tia a hmathlir a nih thu a sawi bawk.