Mizoram Truck Owners’ Association (MTOA) leh Mizoram Truck Drivers’ Association (MTDA)-in Vairengte leh Sairang inkar kawng chhia avanga nimin atanga an lirtheite tlan lo tura an puan chu an kaltlangpui.
The Zozam Times thudawn danin MTOA leh MTDA te hi Vairengte leh Sairang inkar kawng hmun eng emaw zatah duty-na hmun siama thutchilhin, lirthei veivak an thlithlai reng a. Duty an insiamna hmun thenkhatah lirthei thahnem tak chu tidingin, tlan lo turin an ngen a ni.
Hetih lai hian MTOA leh MTDA chuan he lai kawng zawha lirthei veivak zingah passenger phur leh lirthei tê chi chu dan pangngaia tlan tlangtir an nih thu, thudawnna chuan a sawi.
Nimin vek khan PWD Minister Vanlalhlana chuan Kawnpui leh Khamrang inkar kawng thawm that mek a tlawh a. Bungraw phur truck enkawltute nen inbiakna an nei em tih erawh hriat zui a ni lo.
Tar lan tawh angin Thawhtanni khan MTOA leh MTDA chuan Mizoram châk lakna kawng, Vairengte leh Sairang inkar chu a chhiat avangin tun an truck-te a chhe nasa em em a. A khalhtute nunna atan pawh a hlauhawm tak hial avangin nimin atang khan an tlan ngam dawn lo va. Truck tlan ngama kawng hi siam a nih hma chuan Mizoram chhungah bungraw phur truck engmah a tlan dawn lo tih sawiin eibar leh ni tin mamawhah harsatna an tawk a nih chuan mipui hriatthiam an ngen a ni.