Aizawl: Health Minister Lalrinpuii chuan nimin khan Mara Autinomous District Council (MADC) a tlawh.
Health minister chuan Siaha district mipuite tan theihtawp chhuahpuiah sawmin Siaha district chhunga a department hnuaia project hrang hrang hmalaknate chuan hmasawnna rotling thlentu a nih ngei a beisei thu a sawi a. An mamawhte theihtawpa ngaihvenpui tur leh hmalakpui zel a tum thu a sawi a, project an thehluh turte pawh a bawhzuipui zel tur thu a sawi bawk.
MADC CEM M Laikaw pawhin kum thara minister tlawhtu hmasa ber a nih avangin lawmthu sawiin, Siaha district-in a mamawh hrang hrang a sawi a. District hospital-a doctor leh nurse indaih loh thu te, ICU function thei loa a la awm thu te, Urban Public Health Centre chungchang te, Siaha-a nursing school chungchang te, MCHP O-pi (Drop in centre) te leh de-addict centre/rehabilitation centre bakah tul leh pawimawh dangte lo chu hmalak pui turin a ngen.
Minister hian MADC CEM M Laikaw bakah executive member-te leh Member of District Council-te kawm bawkin Siaha district hmasawnna tur hrang hrangte leh hmasawnna rualrem taka sem a nih theih nan tul leh pawimawhte an sawiho.