- Reuben Lalnunthara Hnamte
Khawvelah hian kan lo pianchhuah atangin duhamna hian kan khat nghal emaw tih tur hi a ni a. Chu chu sual apiang kan nihna tichiangtu pakhat a ni. Evi pawh khan Pathianin a eitur apek ang kha ei mai se, an eikhawp a pe ngei kha a ni si a, a dang an it khanglang khan thil a khawih pawi zo ta a ni ber mai. Lal Isuan tawngtai dan tur min zirtirah pawh “ nitin kan eikhawpin chaw min pe ang che” a ti mai a. Kan eikhawp bak kan duh thin hian a lawm keimahni, chhungkua, khawtlang leh ram min tihbuai thin ni. Khawvel mihring tupawh hian kan eikhawp, kan chhungkaw mamawh tawkah hian lungawi vek ila chuan kan buaina tam tak hi chu sutkian a ni ngei ang a, midangte tan malsawmna pawh a ni bawk ang. Kan eikhawp bak kan duh thinna hian midnagte chan tur kan chankhalh a, ram siamthatna turte, khawtlang siamthatna turte keimahni tan kan invur thinna hian midnagte leh kan ram ngeiah pawh hmasawnna a tithuanawpin keimahni ngei pawhin kan chhiatphah bawk.
Nitina kan ei leh in chungchangah pawh hian kan taksain a mamawh tawk hi ei mai ila, kan ka in tui a tih avanga kan ei teuh teuhna hian kan taksa a khawih pawi thin a ni. Mi damrei tak kan tih leh hrisel tak ho hi han zirchiang ta ila, thil ei tawk tawk an ni ngai lo; an taksa mamawh tawk chauh ei thin an ni tlangpui ang a, chutiangin mi hrisel tak kan tithe pawh hi an ni thin. Kan taksain a mawh lo hi kan thun hnem lutuk a; meizial, kuhva, ruihhlo leh a dang tam tak. Hengte hian kan taksa chu chhiatna lam panin min hruai thin. Kan ram ang em em a zuk hmuam kuhva, ruihhlo uar leh hmang thiam si lo hi kan tam lo khawp ang. Sual anga kan ngaih si loh, meizial, kuhna, sahdah, tuibur leh Gutkha lamte hi kan taksain a mamawh ka hre miah lo va, kamhlei tih mai mai a ni. Hengte hian sum a hehin, kan taksa hi zawi te tein a eichhia a, ruihhlo ti te nen hian enge a danglam chuanna tih mai tur a ni.
Kan mamawh tak bak hi awt lo ila, kan mamawh tawkah hian lungawi ila, tichuan kan thatpui ang. Mamawh tawk bak kan awhna hian thilsual tih duhnaah min hruaiin, duhamna a hring a, chu chuan chhiatna min thlen thin. Hausak lutukte pawh hi atha chuang hauh lo; mi hausa tak inngaitlawm leh inphahhniam tak an vang em mai. Hausakna chuan chapona a hring chhuak nge nge. Lal Isua pawhin “ Mi hausa Pathian rama luh aiin, sanghawngsei hriau benga luh tlang a awl zawk “ (Marka 10: 25) a tih hial kha. Hauhsakna hi hmanthiam a har ngang a niang, thatpui aiin chhiatpui hi an tam zawk mah a ni. Mizote phei hi chu hausa vak chi pawh kan ni lo; kan chapo hma si; mizote zingah mi hausa, thlahte thlenga belhtlak tak hmuh tur kan la vang rih viau a ni. Pawisa kan han neih deuh chuan ruihhlo, hmeichhiat mipat, car man to leh a nuam leh tui tinreng hi kan duh nghal zel chu a nih hi.
Kan ramte hi han thlir ila, kohhran leh inkhawm tamna ram, Pathian thu duh ram anga lang si hian kan sorkar hnathawhte, contract thawh te leh sum leh pai duhamna uchuakah hian India ram stateah hian a diau lo pawl tak chu kan ni ngei ang. Nupa kar buai, uirena atam uchuak a, kohhranah chuan thawhlawm kan thawh thain kan puithu ang lawi viau lawi si. Lemchan thiam tak chu kan ngei ang, langlo lamah chuan Hollywood hmunpui hi a ni ringawt mai a ni. Pathianin a hnamthlan Israel ho thlalera a hruai laia eitur an tlakchhama an phunnawi chiam lai khan, Manna leh vahmim kha an eitur atan a pe a. Manna kha lo duham faldeuh, lo char uar deuh khan an neih belh chuang hauh lo. An eitawk bak kha chhar lo turin a ti a, thuawih lo fal deuh kha an lo awm thin a, mahse, midang aiin an neihtam phah chuang lo. An lak tam leh an dah chhe hnem a, an ei tawk bak kha zu phal hauh lo va. Pathian hian amah ringtute hi eitur kan tlakchham chu a phal hauh lo, mahse, mahni mamawh tawk aia duhamna erawh a duh lo hle.
Tunlaiah chuan mi hausa hovin in lian leh ropui tak tak neihte an inel a, mahse, an damchhungin an luah seng chuang lo, kan mamawh tawk hi chu tlemte leh zim tak a ni. Thil hlu manto tak tak neihte hi a hlu viau, mahse, rei kan hlut lo, a dang kan duh leh zel a, kan awhlai hi a nawm lai tak a ni. USA a Holliwood mi hausa ho in ropui tak tak leh an rohlu an chhuan em em te kha, ni hnih khat thil thuah a kangral vek mai a nih kha. Kum 2020 chhung ringawt khan Billionaire mi 17 ngawt an thi zu nia! Chung mi zinga pakhat kum 82 mi, Joseph Sopra Brazil ram a mi chuan dollar 23.6 billion zet a thihsan! Heng billionaire te hi an hausakna hian vawi tam tak chu an nunna a lo chhan tawh a ni thei e, Mahse,a tawpah chuan an thi ve tho zawng a nih hi! Chu chu a tawpa kan chan chu. Heng mi ropuite thusawi hi a tha ka ti khawp mai. * Dikna hlen a lawmman hmuh loh hi, dik lo taka hremna pumpelh aiin ka duh zawk – Murcus Cato. * Thildik tih vanga hmuhsit hi, thildik lo tih vanga fak hlawh aiin a tha zawk- Roy B.Zuck. Kan ramah hian Kawngpui, insak leh a dangteah contractor duham tak takin chhe taka hna an thawh kan hmu fo mai. Khang ho khan an help hnem avang khan an hlim phah ka ring miah lo, an hmingchhe bawk si, midangte leh ram tana pawi an khawih avangin an hmungil hran hauh lovang. Dik taka thawkte hian hmingthat an hlawh a, an hlep neih chhunte an hmang tangkai a, an hlim zawk bawk.
Crisda Rodriguez Designer, a thih dawn a a thu sawi tawi (Cancer vang thi ani) “Ka Garage ah chuan Khawvel Car man to ber te zinga mi a awm a mahse Wheelchiar ah bak ka chuang thei silo. Ka in chhungah incheina thuamhnaw pheikhawk leh thil hlu chi tinreng a awm a, mahse damdawi in a damdawi in kawr thawl tak bak ka in bel thei silo. Bank ah pawisa tamtak ka nei a mahse ka sawngsawhlawt pui silo. Lal in ang maiin In ropui ka nei a mahse damdawi in khum hi kachan tawk ani. Five star Hotel hran+ah ka kal kual vel thin a, tunah erawh chuan damdawi in hrang+ah ka kal kual ta. Mi tamtak tan hming ka sign kual vel thin a, tunah erawh chuan doctor in ka tana damdawi hming a ziak tlemte ka neih chhun ani ta si. Ka sam chei nan lunghlu chi sarih ka nei a, mahse tunah chuan sam pawh ka nei ta lo. Keima thlawh theihna in ka duh+ naah ka kal/thlawk kual thin a, tunah rawh chuan kal kual tur pawhin mi pahnihin min pawm kual ka ngai ta. Ei tur tamtak nei mah ila, tunah erawh Damdawi Mum hnih leh zan lama chi tlemte liah bak ka ei thei ta lo”. Hei hi a sin hringnun chu lo ni; I mamawh tawk ei la, ilo hrisel anga, I mamawh tawk aia tam duham lo la; Pathian tihna nen I nun hmang la, he khawvel hi I tan vanram a tlafual a ni mai dawn a ni.