Aizawl: Chakma Autonomous District Council (CADC)-ah BJP sorkar, Chief Executive Member (CEM) Molin Kumar Chakma kaihhruai chu nimin khan rinawmna thu tiam tira lakluh a ni.
CEM thar atana Molin Kumar Chakma lak luh inkhawm hi CADC Rest House, Kamalanagar-II-ah neih niin, he hun hi Lawngtlaia Additional Deputy Commissioner (ADC) Zoramsiama Hmar chuan a kaihruai a ni.
Inkhawmah CEM atana lak luh thar, Molin Kumar Chakma chuan thu sawiin, CADC-a inthlak danglamna thlen thei tura a inpekna chu a nemnghet nawn leh tih a sawi a. Hun rei tak chhunga harsatna awm tawhte tihbo a, rorelna langtlang leh mawhphurhna an neihte hlen chu an hmathlir a nih thu a sawi a. CADC huam chhungah zirna leh hmasawnna ruhrel chak zawka kalpui a tum thu a sawi.
He hunah hian Nirupam Chakma, Member, National Commission for Scheduled Tribes (NCST), Devesh Kumar, Member of Legislative Council (MLC) leh Mizoram BJP Prabhari, M. Laikaw, Chief Executive Member (CEM), Mara Autonomous District Council (MADC), K. Hramho, MLA, Palak Constituency leh Sandeep Agarwal, Treasurer, Mizoram Pradesh BJP ten an telpui.