Aizawl: Higher & Technical Education Department Commissioner & Secretary H. Lalengmawia chuan Mizoram State University dinna tur bill buaipui mek a ni a, tun budget session-ah hian sawiho tura pharh hman tum a nih thu a sawi.
Ningania Mizo Department, Pachhunga University College-in ‘Thangliana Kutchhuak leh Sulhnu Zir Chianna’ (National Seminar on Thomas Herbert Lewin’s Legacy & Contributions to Mizo Literature) tih an buatsaiha khuallian nia he hun hmanpuitu H. Lalengmawia hian, NEP 2020 chuan kum 2035 hnu lamah chuan Affiliated College awm phal a nih dawn tawh loh avangin, tuna Mizoram University hnuaia college te an awm ang hian an awm thei tawh dawn lo tih a sawiin, “State sorkar chuan sum harsa chung chung pawhin state university din turin ruahmanna a siam mek a, a bill pawh beih a ni tawh a ni,” a ti.
H Lalengmawia chuan State university chu a hautak lo thei ang berin, Clustered University-a din tum a nih thu a sawi a. College leh institution hrang hrangte chu hman tangkai tum a nih thu a sawi bawk.
Kum 2019-a Prime Minister-in a thua a hawn tawh, Mizoram Engineering College pawh central-in a rawn nawr nasat tawh avangin, kum 2026 session-ah chuan, subject pali velah a taka class tan hman nei tum a nih thu a sawi bawk.
PUC Golden Jubilee Hall-a hun hman hi Enid H. Lalrammuani, Asst. Professor-in a kaihruai a. Dr. H. Laldinmawia, HoD (UG&PG), Department of Mizo chuan inlawmna thu a sawi a, Dr. Lalrammuana Sailo, Seminar Coordinator chuan Thangliana chanchin tlangpui a sawi a. PUC Principal, Prof. H. Lalthanzara pawhin thu a sawi bawk.
‘Thangliana Kutchhuak leh Sulhnu Zir Chianna’ seminar-ah Mizoram chhung leh pawna mithiam 30 dawn laiin paper an present dawn a. Seminar hi vawiin hian an chhunawm leh dawn a ni.