Mizoram district pakuaa local council (LC) leh village council (VC) thlanna neih fel niin khawtlang hruaitu tha tak tak thlan chhuah an ni a, heng thlanchhuahte hi an in-form fel hlawm tawh bawk.
Tun tum VC/LC inthlanah hian hmun tam zawkah chuan sorkarna siam thei party atanga tling an awm lo a, heng mite hian an tlinpui party dang atanga thlanchhuahte chu thawhpuiah sawmin khawtlang rorel turin tangrual sorkar an siam a, chutiang chu hmun tam taka sorkar an siam dan a ni.
Hetih lai hian Mizoram khawthlang lam, Mamit district huam chhunga awm, Kawrtethawveng khuaah chuan VC member hi panga neiin, state-a rorel lai, ZPM party chuan seat hnih lain, INC-in seat hnih bawk an la a, MNF party chuan seat khat an la ve bawk.
Hetia en mai hi chuan MNF hawina lam zawk zawk hi sorkarna siam thei mai tur nia rin a ni a; mahse, a ni miah lo! Heng VC thlan chhuahte hian party bil sorkar tur niin an inngai lo a, khawtlang aiawha pen chhuak tak meuh an nih avangin thawhpuiah a tu-a-mah insawm tawn lovin a rem dan angin an insiamrem tawp thei. VCP nih inchuhna boruak a awm lo a, khawtlang hmangaihna avangin lungrual takin an in-form kim thei.
VCP atana ruat chhuah ZPM atanga thlan tlin, Lalngaihawma chuan, “State-a rorel lai kan nih avangin VCP tur atan hian min ruat tawp a ni mai a, kan duh vang pawh a ni lo. Mahse, thawhpuiten min bel a, kan vuan ve a ni mai,” tiin The Zozam Times a hrilh.
“A president kan chan dawn chuan INC te hi pahnih tho tling in ni a, post khat chelh ve se kan ti tlang a, INC atanga tling pakhat chu treasurer post-ah kan dah leh bawk,” a ti.
INC atanga thlan tlin, Chawngthanhranga pawhin khawtlang hmangaihna leh hmasawnna tura ke pen chhuak an nih tawh avangin sorkarna siam ngawr ngawr an tum loh thu a sawi a. MNF atanga thlan tlin awmchhun pawh an biak hran loh thu leh inkawmngeih leh inlungrual taka VC post chu siam rem thei zawk an nih thu leh an lung a sik zan thu a sawi.
Hetih lai hian MNF party atanga tling awmchhun, mi tam takin rorelna fawng chelhtu lama awm thei tura an ngaih, Ramthangzuala chuan lungsi taka member-a a awm thu sawiin, khawtlang tana ding an ni miau tawh avangin rorelna siamtu ngawr ngawra tel chu a tum a nih loh thu leh an party mi leh sate atang ngei pawha awm tura nawrna chu a dawn thu leh ama duhthlanna thiang tak hmanga thutlukna chu siam a nih thu sawiin, lungawi lohna engmah awm lova member nih mai a duh tawk thu a sawi ve bawk.
The Zozam Times -in a rilru a nat leh nat loh a zawhna chu, “Na lo e, khawtlang aiawha thlan chhuah kan ni a, engmah lungawi lohna ka nei lo. Ka duhthlanna thiang tak hmang ka ni,” a ti.