Aizawl: State Bank of India (SBI) Guwahati Circle chuan Corporate Social Responsibility (CSR) fund atangin Sports department hnenah Rs nuai 25 man hu infiamna bungrua leh thawmhnaw an pe a. Mizoram Youth Commission hnenah bus an pe bawk.
Mizoram Secretariat Building, MINECO-ah Inrinni khan SBI Guwahati Circle atangin Vinay M. Tonse, Managing Director (RB&O) chuan Sports Minister Lalnghinglova Hmar leh MYC Chairman Malsawmzuala Ralte hnenah thilpekte hi a hlan a ni.
Inhlanna hunah hian Lalnghinglova Hmar chuan Mizoramin Olympic 2036 vision an neih mekah SBI te chu tel ve a, pui tura ke an pek chu lawmawm a tih thu a sawi. Bana Kaih Programme hnuaia ‘Empowering Mizoram Sports’ an kalpui zelna kawngah pawh an ti tak hle tih an hriat avangin, he hmalakna hi bul tanna chauh a nih ngei a beisei tih a sawi.
Sports Minister chuan Mizorama EMS kalpui mekah, Mizote hi infiamna ngaina an intihlaiin, state dangte nena inelnaah an result a tha tawk lo thin tih sawiin, “Hei hi talent kan neih that loh vang ni lo vin, a haichhuah leh a chher hriam lamah tan kan lak a ngaih vang a ni,” tiin, Indiain Olympic Games 2036 thlen tumin hma a lak naah Mizoten Olympic a India aiawh thei tur chherchhuah an duh a. Chumi denchhen chuan Olympic 2036 thlir chungin ‘Empowering Mizoram Sports” program an duang a, hemi hnuaiah Mizoram hmun hrang hrangahte talent haichhuah leh coaching kalpui a nih tur thu a sawi.
Vinay M. Tonse pawhin CSR fund hnuaiah hmalaknate hi an tih tur a nih avanga ti mai an nih loh thu a sawi a. SBI chuan infiamnaah hmasawnna tak tak neih an duh avangin a ngai pawimawh a, awmze nei zawka hmalak a nih theihna turin ti an nih thu a sawi.
He hunah hian MYC Chairman Malsawmzuala Ralte pawhin thu a sawi a ni.