Aizawl: Inrinni khan BDO Office Complex, Darlawnah Chief Minister Lalduhoma’n PMKSY Campaign a hawng a. PMKSY chu sorkar laipui scheme pawimawh a nih bakah mi tin nghawng phak a nih thu a sawi.
Chief Minister Lalduhoma chuan, “PMKSY-in a tum ber chu leilung leh tuihna chhe zel ven a ni a, hmalakna pawimawh tak a nih avangin sorkar laipui pawhin a la thutak em em a, mi tin nghawng phak thil a ni,” tiin, he scheme hi mipui pawhin chiang taka hre tur leh ngaihven turin a chah.
Sik leh sa danglam zel hi an tuar nasa tial tial tih sawiin chief minister chuan, “Sik leh sa mumal lo hian kan thlai thar chhuah a nghawng a, chu chuan kan ram ei leh bar dinhmun nasa takin a nghawnga. Tui tel lovin tumah kan awm theih loh avangin, tui inchuh avangin ram leh ram indo nite pawh la thleng thei a ni. Tui leh leilung chhe zel tur venna kawnga hma kan sawn zel theuh nan sorkar hmalaknate chhawr tangkai turin mipuite kan inchah nawn leh duh a ni,” a ti bawk.
Chief minister hi Vanlalhlana, PWD Minister, Lalthansanga, EF & CC Minister, B Lalchhanzova, Supply Minister, Dy Speaker Lalfamkima leh MLA & Adviser to CM Lalmuanpuia Punte ten an tawiawm a. PMKSY beneficiary-te bakah Darlawn khaw chhunga sorkar office leh zirna ina thawktute an tel a ni.
PMKSY hi Mizoram district tinah kalpui mek a ni a, khaw 52 zet tuamin, he Scheme hian Afforestation te, Terrace siamte, Contour laihte, Bunding siamte, Check Dam sakte, WRC siamte leh a dang dangte a huam a ni.