Aizawl: Horticulture Minster Prof Lalnilawma chuan ZPM sorkar chuan theihtawp chhuahin tam tana tha tur ngaihtuahin hma a la mek tih a sawi.
Nimina ZPM-in an party pisa-a chhung inkhawm an neihah thusawiin Prof Lalnilawma chuan, sorkar chuan theihtawp chhuahin ram tana tha tur ngaihtuahin hma a la mek avangin, Zoram mipui pawhin sorkar thar hi beiseina nen an thlir mek tih a sawi a. Mi thenkhatin ZPM sorkarah mipuite beidawng ta viau anga thu an thehdarh mek a, hetianga mipuite rilru hruaipen tumna lakah mipuite pawh an fimkhur a ngai hle tih a sawi.
Prof Lalnilawma chuan kalphung thar, mipui sorkarin mi mal hamthatna aia vantlang mipui hamthatna a ngaih pawimawh avangin, mipui nawlpui tana hmasawnna chhenfakawm thlen tumin hma a la zel dawn tih sawiin, “Mi tlem tein hmasawnna zar an zo chuan a tuartu chu ram leh mipuite an ni, tih kan hriatreng a tul a ni,” a ti.
Lengpui Airport chungchanga a party ang pawhin beih an tawk nasa hle tih sawiin Prof Lalnilawma chuan, “Kan Chief Minister Pu Lalduhoma chuan ‘Ram tana tha tur a nih chuan huaisen takin kan kal dawn a ni’ a tih angin, ZPM ministry hian kan ram tana tha tur thil kan ngaihtuaha huaisen takin hma lam kan pan zel dawn a ni,” a ti bawk.
A bikin Horticulture leh RD dept ah hian link road chungchangah dilna an dawng nasa hle tih sawiin, Prof Lalnilawma chuan, “Hun rei tak state kan nih hnuah pawh a tun thlenga link road kan mamawhna a la sang reng mai hi tute mawh nge tih hi zawhna lian tak a ni,” tia sawiin, tunah hian link road eng emaw zat siam turin hma an la a, kum tharah hian hnathawh tan theih an inbeisei thu a sawi.