Aizawl: Chief Minister Lalduhoma’n kalphung thar mipui sorkarah PWD-in hmel thar a hmuh mek thu a sawi.
Thawhlehni tlai khan PWD hotute chuan Thara Resort, Falkland-ah infuihtharna hun an hmang a, he hun hmanpuitu chief minister chuan ZPM sorkar hnuah PWD-in hmelthar a hmu chho zel chu lawmawm tih sawiin, “Engineer-ten an promotion tur aia ‘Engtin nge kawng tha kan siam ang?’ tih ngaihtuahna an seng chho ta zel hi, kalphung thar mipui sorkara danglamna kan hmuh a ni,” a ti.
Engineer hna chu ram rawngbawlna hna ropui tak a nih thu sawiin Lalduhoma chuan, “Mi mal eizawnna a nih bakah ram tana thil tha leh rohlu hnutchhiah kawngah a taka thawktute an ni a, an lakah hian mipuiten beisei kan nei sang hle. Ram changkang tehna pawh hi Engineer-te kutchhuakah a innghat thui hle,” tiin, engineer hna hi hna ropui leh ram rawngbawlna hna pawimawh tak a nih avangin thahnemngai taka thawk zel turin engineer te a chah.
Hmun thenkhata hmasawnna hna kal lai mek leh mi hna zawh fel hmaa epty party lamin sorkar beih nana an hmang thin chu politics ram hlui zia a ni tih sawiin chief minister chuan, “Mipuite pawhin heng sorkar tihmualpho tumtute hi ngaihdan tawk kan thiam a tul hle a ni. Chutih rualin, kalphung thar mipui sorkar hnuaia hna thawh reng reng a tha bik tur a ni,” tiin, hna tha tawk lo chu state monitoring committee-ten an umzui zel dawn tih a sawi.
PWD Minister Vanlalhlana pawhin thu sawiin hun kal tawhah PWD chu mi tam takin corruption tamna department-ah an ngai a, department enkawltu leh a thawktute pawh mipuiin hmuhdan dangdai deuh an nei thin chu pawi a tih thu sawiin, kalphung thar mipui sorkarah erawh chuan chu ngaihdan chu thlak thleng turin a takin hma an lak mek thu a sawi bawk.
He hunah hian PWD Engineer-in-Chief C. Lalsangliana, ZPM Party President Lalliansawta leh Er. Vanlalneiha ten thu an sawi bawk