Champions Trophy khelh mekah India chuan Pathianni zan khan an group match hnuhnung berah New Zealand chu run 44-in an hneh a, final luh inchuhnaah Australia nen an inhmachhawn dawn.
Dubai khawpuia ball lirh muanna khelmualah India hian vaw hmasain run 249 chauh an tlin thei a, Black Caps tan umphak harsa tur angin lang lo mah se run 205 chauh tlinin an thi vek a. India tan vawm vir thiam an che tha a, Varun Chakravarthy phei chuan mi panga a vawm hmunah run 42 chiah a pe a ni.
Kane Williamson-a’n run 81 vaw chhuakin New Zealand chu chak mai thei tura ngaihah a chhawp hman a; mahse, an vuak laihawl velah talbuai tanin run an siam muang ta hle a. A tawp lam mi pasarih phei chu run 72 an siam chhungin an thi hman vek nghe nghe a ni.
Tar lan tawh angin India hi inelna thlengtu, Pakistan-ah politics thil avanga a zin duh loh avangin Dubai-ah vek an khel a, Thawhlehni hian Steve Smith-a kaihhruai Australia chu knockout match hmasa berah an hmachhawn dawn a ni.
Chak lo mah se New Zealand pawhin semifinal an lut ve tho va, Nilaini hian Lahore-ah South Africa an hmachhawn ve thung dawn a ni.
India pawh hi an vuak lai hian a tir lam chu an buai hle a, run 30 chauh an tlinah mi pathum an thi hman a. Thi zingah hian Glenn Phillips-a’n mawi danglam taka run 11 chauh siam thei, Virat Kohli-a ball vuak a man pawh a tel a ni.
Bul tan tha tawk lo mah se Axar Patel leh Shreyas Iyer chu chiai lovin an ding nghet zui a, an pahnih inkawpin run 93 an tlin a, hei hian India dinhmun a siam tha a. Iyer-a hi run vaw chhuak tam ber niin run 79 a siam a. Hardik Pandya chuan ball 45-ah run 44 a tlin thei bawk a, India chakna atana pawimawh tak a ni.
India batter chet that tawk loh karah New Zealand hi ball chânah an tha hle bawk a, hei hian run tam zawk an siam tur a veng a. A vawmtu lamah seamer Matt Henry chuan mi panga a vawm hlumah run 42 a pe a, a che tha ber a; mahse, India vawm vir thiamte an che tha zui em a, a chet that a hliah deuh zawk a ni.
India captain Rohit Sharma chuan team tha tak laka hnehna an chang thei chu a pawimawh tak zet tih a sawi a, “New Zealand hi an tha a; mahse, vawiin khan kan khel tha em a ni,” a ti.
Australia an hmachhawn tur chungchangah Sharma chuan, “Tun ang inelna rei lo angah hi chuan chak vek kan tum a. Australia hi an chanchin enin an pui khawp mai a; mahse, keimahniah engkim a innghat a ni,” a ti.