Aizawl: Home Minister K Sapdanga chuan ruihhlo leh sual dona kawngah YMA Branch hrang hrangte an hmalakna a thlawp tlat thu a sawi.
Thawhtanni khan Home Minister K Sapdanga hian Tuikhuahtlanga YMA Zawlbuk a tlawh a. Central YMA chuan an president Lalhmachhuana, Vice President & Chairman, Kumpuan Committee Prof Lalnuntluanga, OB dangte leh CEC member eng emaw zatin an lo dawng sawng.
He hunah thu sawiin Home Minister chuan ruihhlo leh sual dona kawngah thawhhona tha neih a tul thu leh, tih takzeta tha thlah lova hmalak zel a tul thu sawiin, YMA chu thawhhopuiah a sawm a, tlang hrang hranga YMA Branch tinte hmalakna chu a thlawp tlat thu a sawi bawk.
March 15, 2025 atangin Central YMA hnuaiah Central Anti Drugs Squad (CADS) kalpui leh tan a ni a, heng hmalakna kalpui chhoh mekah nimin thlengin No. 4 hawng 30 man tawh niin, codeine bur 2,000 chuang zet leh ruihhlo dang thahnem tak bakah, ruihhlo kaihhnawihah mi 80 chuang zet thuneitute leh home-ah dah an ni tawh a. Ruihhlo ti thinte siamthatna tura hmalakna Mizoram Synod nen Counselling kalpui zui zel a ni.