Aizawl: Education Minister Dr. Vanlalthlana chuan Mizoramin Education Conclave nei tura rawtna an thlente tihhlawhtlinsak turin Niti Aayog Member Dr. VK Paul a ngen.
Zirtawpni khan Education Minister Dr Vanlalthlana hian Mizorama zirna leh technology tihhmasawn dan tur chungchangte sawipuiin New Delhi-ah Niti Aayog member Dr VK Paul a kawm a. Dr. Vanlalthlana chuan, Mizoram zirna ruangam enfiah nana neih a tul thu leh hmasawn ngaihna lai, a bikin ziak leh chhiar thiam tam nihna chu rampum huap exam-a tih that nan leh hnathawka rawih tlak tam zawk chher chhuah nan Education Conclave chu hmanraw tangkai tak a nih dawn thu a thlen a. NITI Aayog chuan he hmalakna hi phurawm tiin, State Support Mission (SSM) kaltlanga puih an inhuam thu a hrilh.
Education minister chuan secondary leh higher secondary zirlaiten financial literacy leh thiamthil zirna kaltlanga mahni kutkawih intodelh tumna thinlung an put theihna tura hmalakna pilot project, ‘Project Intodelh’ (Self-Sufficiency) chungchang thlen bawkin, NITI Aayog lam chuan he project hi hmalakna tha ber nia an ngaih thu leh class III leh VI te tana Random Examination 2024-25 neih atanga State Report Card an hnena thehluh chu best practice document-ah an pawm a nih thu an sawi.
Heng bakah hian zirna hmuna zirlaite hriselna endik leh vil chunchanga hmalakna pawh sawi ho niin, Dr. VK Paul chuan he scheme hi hlawhtling taka kalpui turin School Education Department leh Health & Family Welfare Department-te tanrual a tul thu a sawi.
Minister Dr. Vanlalthlana chuan he hunah hian Mizoram University campus-a Software Technology Park of India (STPI) din kawnga Mizoram sorkarin harsatna a tawhte pawh a sawiin, NITI Aayog chuan harsatna tawhte chinfel thuai a nih theih nana hmalakpui an inhuam thu an sawi bawk.