Aizawl: Mizoram Youth Commission (MYC) Chairman Malsawmzuala Ralte chuan sorkar kum kalta chhung khan MYC coaching centre zirlai mi 33-in Mizoram sorkar hnuaiah hna nghet (regular) an hmu tawh thu a sawi.
Nimin khan MYC Conference Hall, MINECO-ah thu thar thehdarhtute kawmin Malsawmzuala Ralte chuan MYC hlawhtlinna hrang hrang a sawi fiah a. Tun dinhmunah district panga Aizawl, Lunglei, Siaha, Champhai leh Kolasib-a centre-ah te MPSC Group A&B coaching kalpui mek a nih thu a sawi. Financial year 2024- 2025 chhungah pawh hian zirlai 588 zetin MYC coaching centre hrang hrangah coaching kalin, hriat theih chinah MYC coaching centre zirlai mi 33 ten Mizoram sorkar hnuaiah hna nghet (regular) an hmuh tawh thu a sawi.
MYC Chairman chuan MPSC (Group A&B) coaching kal man hi sorkar atanga tum then sak (subsidised) niin, course fee man tlawm zawkin kalpui a ni a, private-a coaching kal remchang thei loten an hlutin an tangkaipui hle niin a sawi.
MYC hnuaia Hotel Management (food & beverages) training an kalpui mekah first phase atan training course hi zawhfel tawh niin, mi 122 training zingah mi 97 in placement an hmu nghal vek a, hei hi zaa 79.51 a nih thu a sawi bawk.
Malsawmzuala Ralte chuan training chhuak te hi zaa 100 placement hmuhsak theih ni mah se, trainee thenkhat, hrisel lohna avanga anmahni duhthlanna a hna zawnpui ngai inti lo mi tlemte tih loh chu India ram hmun hrang hrang hotel tha leh rintlakah hna an hmu vek a, an thawk mek hlawm tih a sawi.
MYC-in an pisa-a Mizo tlangval zinga British Army-a tang duhte online-in dilna an theh luh sak thin a, hlawhtling taka dilna thehluh hi mi 247 niin, heng mi atang hian tun dinhmunah visa hmu fel tawh, UK a Assessment ti tura thleng thla tawh hi mi panga an neih thu a sawi a. May 1, 2025 hian a tul angte an test dawn a. Visa result nghak mek hi mi pali nei mekin Official Invitation Letter nghak, chumi hnua visa dil ve mai tur hi mi pahnih an neih mek thu a sawi bawk.