Aizawl: MNF President Zoramthanga chuan kum khat chuan ZPM an sorkar chhung hian a ni telin sorkar hnathawkah leh kut hnathawktute an tlahniam zel tih a sawi.
Thawhtannia Kolasib District chhunga MNF VC tling tharte lawmpuina hun, Diakkawn YMA Hall, Kolasib-ah hman a ni a. He hun hi MNF President Zoramthanga’n hmanpuiin thu a sawi a. “ZPM hi itawm chi tin rengin an inzuar a. Bang lehlama nula aw mawi tak, amah kan la hmuhchian loh kha nupuiah Zoram mipuiin kan nei ta a. Kan han vote ta ruih ruih a, kan vote tling ta a. Thil kha an sawi awl bawk a, D-A-H DAH atangin an tan a, tunah chuan an sawi loh ang hlirin an awm ta a. An sawi angin an awm lo a ni,” a ti.
ZPM chu kum khat an sorkar chhung hian sorkar hnathawkah a ni telin an tlahniam zel tih sawiin MNF President chuan, “Sorkar hnathawk lian an nuih a za a, naupang inkhuallem kan ang, an ti,” a ti.
Sorkar hnathawk tê deuh ho an lungawi lo mek bawk tih sawiin, “Cancer vei pawh an thliar tawh lo. Doctor rual an phin leh a, health care te an ti suakbak vek a. Naupang leh zirtirtute lungawi lohna a in-up chho leh mek a. Sikul dinhmun sang zawka kan hlan zawng zawngte kha an cancel a, finance minister-in ‘a theih’ ka tih avanga kan tih a ni. Covid hripui lai pawhin a theih a, Covid awm loh hnuah a theih loh an ti ta si hi a mak hle,” a ti bawk.
MNF President chuan ZPM chu hmunphiah sawi chuan ngaihthlak loh an duh zawk tih sawiin, “Sawhthing thar tur zat nia an hriat kha hmun 10-a hmun khat pawh an la lei lo. Sawhthing leh thlaite hi thingtum ang a dah that a, duh hun hun a hralh tum chi a ni lo. A huna seng a, a huna hralh a ngai,” tiin, ZPM sorkar hi kut hnathawktuteah a ni telin an tlahniam zel tih a sawi.
He hunah hian Serlui bialtu MLA Lalrinsanga Ralte pawhin thu a sawi bawk.