Kan ram hi a rethei a, kan hruaitute pawhin theihtawp chhuah ve bawk mah se, sorkar laipui lamah mamawh thlenin, zah pawh dawn lovin pur an chawk a ngai fo thin bawk.
Khawsak harsa leh chhuanchham fote hi kan la tamzia chu khawtlang hruaitu leh tlawmngai pawla hruaitu kan thlanchhuahte hi a hrechiangtu an ni ang. Kan khawsak hi a nuam hlawm mawlh lo. Nitin eikhawp dila tawngtai fo thinte hian kan dil hi kan hmu tawk vel chiah a ni ber awm asin!
Hetiang hi kan ram dinhmun leh kan khawsak dan a nih lai hian tunhnai kum rei vak lo atang khan khawsak nuamsa leh mipui chung en an rawn pung thar hluai mai a, midangte tanpui kawngah leh eizawnna kawnga hlawhtlinna duhawm chang ang maiin an khawsazia pawh an rawn thlak danglam nasa hle.
Hetiang mite hi a ruk taka mi hlauhawm an lo ni deuh tlangpui mai a, an eizawnna ril kan hriatpui si loha sumdawnna bul lian tak taka rawn tan nghal thei lah an tam. Mahse, damdawi leh kuhva hmanga sumdawnna a len leh man tawk an tam zual sauh hnu hian hetiang mite hian awka an chhuah ngam ve lo tlangpui. A mak asin!
Kan nunhona kawnga mi hlawhtling leh sumdawnna kawnga dingchhuak kan tih, kan mi hmasate dinhmun kha vawiin thlengin han thlir kir la, a nghetin, an sum neih an hum thiam dan han chhut mah teh. Vawiina mite nen hian a danglam hlak tawh asin. I ngaihtuahna kha hmang thiam ve la, a nei nung nungte nuam tawlna ramah kan ram hi chhuah i phal lul lo ang u. Tlawn leh biak that tlak loh mihring hi kan thliar thiam a va pawimawh tawh em.