Mizoram Board of School Education (MBSE)-in nimin khan Higher Secondary School Leaving Certificate (HSSLC) Examination, 2025 result a tichhuak a, zirlai exam beitu 12,105 zinga 9,817 (81.10%) an pass a, nikum aiin kumin pass percentage 3.06-in a sang zawk.
Distinction-ah mi 701 an pass a, first division-ah 3,250, second division-ah 3,970 leh third division-ah 1896 an pass a. Fail 2,197 leh compartmental chance nei 91 an awm bawk.
Arts subject bikah chuan Mount Carmel School, Aizawl zirlai, Lalrammawii Tochhawng d/o Reuben Lalrinkima chuan mark 500-ah mark 471 hmuin a pum puiah pakhatna a ni.
Arts subject-ah hian zirlai exam 8,658 zinga 6,938 pass-in, pass percentage chu 80.13 a ni a. Compartmental chance nei zirlai 69 an awm a, hlawhtling zo ve ta lo zirlai 1,651 an awm bawk.
Science subject-ah pawh zirlai exam 2,798 zinga 2,396 an pass a, pass percentage chu 85.63 a ni a. Compartmental chance nei zirlai 14 awmin, hlawhtling zo ve ta lo zirlai 388 an awm a ni.
Aizawla St. Pauls Higher Secondary School zirlai, Cynthia Lalhlupuii Shangpliang d/o Kyrshanbor Shangpliang chu Science subject-ah pakhatna a ni a, mark 477 a hmu a, kum 2023 HSLC examination-ah khan pakhatna a lo ni tawh bawk.
Commerce subject-ah chuan a pum puia mark 470 hmutu, Aizawla Oikos Higher Secondary School zirlai, Kristin Laldinpuii Ralte d/o Lalsangliana Ralte, chu pakhatna a ni.
Zirlai exam 649 zingah 483 an pass a, pass percentage chu 74.42 a ni a. Compartmental chance nei mi pariat awmin, hlawhtling zo ve ta lo zirlai 158 an awm bawk.