Rajiv Gandhi Stadium, Mualpui leh a chhehvel ram chu nimin khan home department kut atangin sports & youth services (SYS) department kutah hlan a ni.
Hlanna inkhawm hi Home Minister K Sapdanga office, MINECO-ah neih a ni a; Home Secretary Vanlalmawia leh SYS Department Secretary V Lalsangliana-ten hming an ziah hnuah home minister-in Sports Minister Lalnghinglova Hmar hnenah a hlan.
Mualpuia Rajiv Gandhi Stadium dinna leh a chhehvel ram hi Landlease No. 23 of 1992 chhunga mi a ni a, home department ram niin, 3rd Battalion MAP hmun a ni.
Kum 2010 khan he hmuna khelmual siam hna hi tan niin Mizorama khelmual tha leh changtlung ber a ni a; a hmunhma enkawl hi SYS department kutah awm mah se a ram hi home department ta a la ni chhunzawm zel a, nimin khan SYS kutah neitu nihna hi hlan a ni ta a ni.
Rajiv Gandhi Stadium awmna leh a chhehvel ram hmun thenkhat, home secretary hminga awm mek chu SYS department hmingin dah a ni tawh ang.
Home Minister K Sapdanga chuan Mizoram Police hmun pawimawh leh ui em em chu thalaite tan leh infiamna hmasawn zelna atan SYS department kuta an hlan thu sawiin, “Neitu nihna thinlung nen tangkai lehzuala in hman ngei ka beisei,” a ti a, a thawhpuiten vawi eng emaw zat an sawiho hnuah an ram hlu tak chu ram tana tangkai tur zawka an rin avangin sports department kutah an hlan ta tih a sawi.
Sports Minister Lalnghinglova Hmar chuan, “Sorkarin sports kalpui duh dan mumal tak a nei a, sports-ah sum leh hun kan seng hnem chungin ram pum huap intihsiaknaah kan la hniam em em. Chuvangin, Rajiv Gandhi Stadium leh a chhehvel hmunhmate hi infiamna hmunpuiah siam a, training-na hmunhma leh Centre of Excellence-a siam tumin ruahmanna kan nei a, home department-in phal taka kan kuta an hlan hi kan lawm takzet a ni,” a ti.
He hunah hian H Ramthlengliana, IGP leh home department hotu dangte an tel a, SYS department hotute an tel bawk.