Kum kaw hnuah Anastasia Electric Vengin final an lut leh a, Nilaini zan EverHome Pro Volleyball League semifinal-ah set hloh lovin Khawbel an hneh a, 2016 final ang bawkin Thutak Nunpuitu Team nen an intawng leh dawn.
LPS Arena, Falkland-ah inhnehtawk tak chungin Anastasia an chungnung tluan a, set thumnaah 23-19-a hniam zawk atangin Khawbel an pawtthla a, 25-23, 25-22, 25-23-in an chak.
Karthik Madhu an lak luh atangin khelh thum an chak zawnna a ni a, India captain hlui hian Electric Veng team tan point 27 hmuin tum li chiah a tisual a, Kuriz Player of the Match-a thlan a ni.
A vanglaia Indian blocker tha, Karthik chuan net chungah Khawbel rinrawl, Tanish Choudhary a dang tla fo a. A hnunga a awm laiin Helly Vanlalliana’n lehlam hlap dang ve thungin hlawk takin Anastasia tan a khel bawk a, point khat chiah hlohin point 10 a thawk chhuak.
Khawbelin Tanish an chhawr rim leh a, tum 38 vaw tlain point 15 a hloh va. Team nawr kal tur khawpin Mizo player-ten an thlawp zo lo va, Lianlunsang Vaiphei chuan tum ruk hlap tlain Joseph Lalbiaksanga’n vawi li a vaw tla a, point hnih ve ve an paih tel.
Anastasia tan Laldinsanga leh Laldensanga an hriam tawk lo na a, pont kua leh point riat hmuin Khawbel Mizo player che tha ber aiin an thawh hlawk ve ve a. Mizo player-te khelh danin team pahnih inkar a tidanglam a, Karthik chuan a elpui, Tanish aiin ball hmu tlem mah se team tan a thawk nep bik lo.
Pro Volleyball hmasa ber, 2016 khan league-a sang ber, TNT hnehin Anastasia an champion a, 2019 khan champion zui ta, Durtlang North hneh lovin semifinal atangin an tla ve thung a. Kum nga hnuah a sang pali zingah tel lehin a vawi hnih nan final an lut a, Inrinni zanah TNT nen bawk champion nih an inchuh ang.
Mizoram inelna sang bera an tel hmasak berah Khawbelin tunlaia Indian player tha, Ashwal Rai an la lut a, a hovin an khelh hmasak pahnihah set hloh lovin an chak zawn a. An kawl zui theih loh avangin India Under 21 team-a tel tawh, Tanish an lak leh phah a, a hova tum li an khelhah a vawi thum nan an tlawm.