Aizawl: Kolkata-a Manipal Hospital hotuten Cardiology, Cardiac Surgery, Neurosurgery, Orthopaedics, Oncology, Nephrology ang chi specialty hrang hrangah Aizawl-ah OPD kalpui a tum thu an sawi.
Manipal Hospital-a Department of Respiratory Medicine Director Dr. Debraj Jash, Department of Respiratory Medicine Director, Neurosurgeon & Spine Surgeon Senior Consultant Dr. Harsh Jain leh General Medicine & Endocrinology Senior Consultant Dr. Kaushik Biswas te chuan Inrinni khan Aizawl Press Club-ah thu thar thehdarhtute kawmin, Manipal Hospitals-in Mizoram tana hma an lo lak tawhna leh hma thar an lakna turte an sawi.
Manipal Hospitals hotute chuan Mizoram leh hmarchhak mipuite hnena inenkawlna tha pe tura a inpekna chu nem nghetin, khawvel hmun dangte anga inenkawlna tha buatsaih turin Kolkata-a an hmunpui kaltlangin Superspecialty hospital panga an nei tih an sawi a. AMRI leh Medica Superspecialty Hospital-te hnung zuiin Manipal Hospitals hian he biala enkawlna tha zawk a awm theihna turin hma an lak thu an sawi.
An sawi danin, kum 15 chuang chu AMRI group leh Medica Superspecialty Hospitals-te hian Mizoram atangin damlo 15,000 chuang an enkawl tawh a, heng zingah hian Medica Superspecialty Hospital (Manipal Hospitals Network unit pakhat)-ah mi 70 chuang chu kal (kidney) an thlak a ni.
Manipal Hospitals hotute chuan kum 2017 atang khan Aizawl Hospital & Research Center nen inzawmin Outreach Clinics kaltlangin Neurosurgery, Respiratory Medicine, Orthopaedics, Urology, Nephrology & Endocrinology ang chi specialty-ah kalpui a. Hei hi mipuiin an khamkhawp loh avangin Cardiology, Cardiac Surgery, Neurosurgery, Orthopaedics, Oncology, Nephrology ang chi specialty-ah Aizawl-ah OPD kalpui an tum thu an sawi.
Tun tuma an hmalakna turah chuan Civil Hospital nena thawk hoin, Association of Physicians of India Mizoram nen CME hmanga inthlunzawm a ni dawn a, specialty hrang hranga inenkawlna kawnga hmasawnna thar ber berte chu inhrilh tawnin, Mizoram mipuite hriselna tha zawk chhawpchhuaksak an ni dawn tih an sawi.