Nilainia indo lawng thar an tlangzarh tuma chesual zui nghal an chhuina kal zelah North Korea chuan lawng sakna hmuna thuneitu pathum an man tih sorkar chanchinbuin a tar lang.
Tonne 5,000-a rit, lawng dang tichhe thei tura duan lawng thar tlangzarhnaah hian a inbuk tawk loh avangin a hnuai lam chu a intauh chhe vek a ni.
He thil thleng, North Korea hruaitu, Kim Jong Un-a’n ‘dan bawhchhiatna lian tak’ tia a sawi hi a chhui hna thawh mek zel a ni.
An rama sorkar thu thar puangtu, KCNA chuan an mi mante hi hmar lam, Chongjin-a lawng tuknaa chief engineer bakah construction head leh administrative manager an nih thu a tar lang.
Heng mi pathumte hi ‘chetsualna thlennaa mawhphurtu’ tia sawi an ni.
Zirtawpni khan KCNA chuan lawng tukna ina manager, Hong Kil Ho-a pawh thu zawh fiah a nih thu a lo tar lang tawh.
Thlalem atanga thla lakah chuan lawng chesual ta hi a sir zawnga awmin tarpaulin pawl lian takin khuh a ni a, a then chu khawmualah a innghat bawk tih a lang.
North Korea-a sorkar chanchinbu chuan thi leh hliam an awm thu a puang lo va, a chhia a awm lo niin a sawi bawk.
KCNA chuan lawng hnuai lamah kua a awm lo niin a chhuituten an hmu tih a puang.
Kim-a chuan chetsualna thleng hi ‘fimkhur lohna lian tak, mawhphurhna hleh lohna leh scientific taka thil kalpui lohna’ tiin Ningani khan a sawi.
He thila mawhphurtu hi thla thara plenary meeting an neih hunah sawi chhuakin thil kalpui zel dan tur an ngaihtuah dawn tih a sawi bawk.
Eng ang hremna chiah nge an tawrh theih dawn a chiang lo va; mahse, an ram hi mihring dikna chanvo palzut nasa ber ram zinga mi erawh an ni.
North Korea hian an tual chhunga thil thleng an puang khât hle a, tun tum erawh a lar hle.
Chetsualna lian tak a thlen hma chawlhkar tam la liam lovah khan North Korea hian tonne 5,000-a rit tho destroyer, Choe Hyon chu a lo tlangzarh tawh.
Kim-a chuan an indo lawng thar hi North Korea lawng sipaite tan thil ropui a nih thu leh nakumah an hman tura chhawp chhuah a ni dawn tih a sawi.