Thawnthu hlui thlen nawntir lehin Anastasia Electric Veng an champion a, Inrinni zan EverHome Pro Volleyball League mipa final-ah set thum set khatin Thutak Nunpuitu Team an hneh.
Pro Volleyball hmasa ber, 2016 khan final-ah set thum set khatin Anastasia-in TNT an hneh a; LPS Arena, Falkland-ah kum kaw kal ta angin set li an khelhpui leh a, 26-24, 25-10, 21-25, 25-21-in an chak.
April tir khan playoff atangin Mizoram inelna sang bera tel turin division hniama awm, Electric Veng team an tling a, rin hlawh phak lovin bul an tan a. Gujarat atangin Yougank Baliyan an la lut a, a hova vawi thum an khelhah tum khat chakin May 8 khan league-ah set thum set khatin TNT lakah an tlawm a, Yougank an chhawr hnuhnun ber a ni zui.
Champion tumin club neituten sum an seng a, India captain hlui, Karthik Madhu lak belhin hun pawimawhah rintlak a nihzia a lantir a, final-ah point 34 hmuin 10 a hloh va. A elpui TNT spiker Vanlaltanchhana aiin point 12-in a thawh hlawk a, Kuriz Player of the Match a nih bakah KT Enterprise Best Spiker-a thlan a ni a, vawi li a khelhah tum 118 vaw tlain vawi 45 a tisual a ni.
Karthik an kawl atangin Anastasia-in nghehna kawng an zawh a, a hova an khelh chinah chak vekin team pum pui a chawi kang a. Semifinal-ah set thum faia Khawbel an hneh tuma che tha, Helly Vanlalliana tlahniamin point nga a hmuh laiin vawi thum tisual mah se, Laldinsanga leh Laldensanga’n team tanpui ve thungin TNT hmaah point 12 leh 11 an hlawh chhuak a, point nga leh ruk an hloh.
Final vawi hnih an luhah Anastasia chak ve vein tum khat aia tam champion thei team pahnih zingah an tel nghal a, vawi thum champion tawh, Hunthar hnung an zui a. 2023 champion TNT erawh final-a an inlan vawi lina niin tun kum li chhungin a tum thumna a ni a, vawi thum an tlawmna a ni ve thung.
Semifinal-ah rin hlawh ber, Tuichangral an hneh avangin Muanna Veng team lakah beiseina a awm phah laiin, san lai leh hniam chang neiin mar tha taka khelh zawn an harsat a. Anastasia hmaah set khatna la thei turin 23-21-a sang zawk an nih hnuah set hnihna thlengin an zuih hle a, set thumnaah kir leh mah se an tlo zui thei lo.
Valbuanga’n vawi 25 vaw tlain point 13 a hloh a, Saidingpuia’n point 11 a thawh chhuah chanve aia tam a paih a. Zosangzuala chet fuh tum a ni lo a, point 10 hlawh chhuak zo lovin Anastasia player-te nen an chet dan khaikhinin an pha lo va. A bikin setter F Lalhriatpuia’n ball a vawrh tha lo a, amah thlaktu, Vanlalchhantluanga Sailo chuan danglamna a thleng zo bik chuang lo a ni.
Hall chhunga leng lo mipui pung khawm hmutu leh final inkhel chhim tura kal, Union Minister of State George Kurian chuan inkhel tan hmain minute hnih chhung thu a sawi a, Mizoten infiamna leh volleyball an ngaihhlutzia a fak bakah Mizoram chu India rama ziak leh chhiar thiam sanna ber a nih thu uar takin a sawi bawk.
Minority affairs changtu, Kurian hian Mizoram volleyball hruaitute dilna a ngai pawimawh a, hall changtlung dinna tur a tihhlawhtlinsak ngei dawn tih a hrilh zui a ni.
- EVERHOME PRO VOLLEYBALL LEAGUE 2025
MI MAL CHAWIMAWINA:
KT Enterprise Mizo Best Player: Vanlaltanchhana (TNT)
KT Enterprise Best Spiker: Karthik Madhu (Anastasia)
KT Enterprise Best Spiker: Zosangzuala (TNT)
KT Enterprise Best Setter: Ramdintluanga (Anastasia)
KT Enterprise Best Receiver: Lalhunthara (Anastasia)
KT Enterprise Best Coach: PC Lalhriatpuia (Anastasia)