Prime minister hlui, Sheikh Hasina-i kaihhruai sorkarin kum 10 chuang liam taa an awm a phal loh (ban), Bangladesh-a Muslim party lian ber chu an awm phal a ni leh ta.
Pathiannia Supreme Court-in thutlukna a siam hmang hian Jamaat-e-Islami party chu Election Commission-ah ziah luh leh theih an ni ta a, an rama sorkar lailawk ding mekin nakum June thlaa inthlanpui a huaihawt turah pawh an chuh thei dawn a ni.
Jamaat-e-Islami aiawh dan hre mi, Shishir Monir-a mihring maktaduai 170 chennaa a tam ber Muslim nihna rama chuan court-in thutlukna a siam chu ‘mipui rorelna leh party tam tak awm theihna’ a nihzia tilangtu a nih thu a sawi.
“Bangladeshi-ten an chi bil leh an sakhaw zui milin Jamaat hi an vote thei dawn a, parliament-ah pawh a tha zawnga inhnialna a chhuah phah ngei dawn a ni,” tiin chanchinbumite hnenah a sawi.
Nikum August thlaa ram puma zirlaite kaihhruaia nawrna hmanga Hasina-i sorkar paih thlak a nih hnuah khan party hian kum 2013-a high court-in an awm a phal lohgna chu ngaihtuah tha turin an thlen a ni.
Kum 77 mi, India-a tlanchhe mek, Hasina-i hi amah awm lo mah se nikuma amah duh lotute a tih let chu court-ah ngaihtuah niin ‘ruahmanna fel tak nena beihna’ tiin sawi a ni a. Kha thil thlengah khan United Nations chuan mi 1,400 vel thiin a ngai a ni.
Supreme Court-in Jamaat-e-Islami khapna a hlih hma lawk, Thawhlehni kal ta khan an hruaitu lawk ber zinga mi, ATM Azharul Islam-a thiam loh lo chantir tawhna pawh court-in a lo hlihsak tawh.
Islam-a hi kum 2014 khan Pakistan atanga kum 1971-a Bangladesh-in indan a sual laiin mi pawngsual, that leh mi suata puhin thiam loh chantir a ni a. Indona chhuah lai khan Jamaat-e-Islami hi Pakistan lamtang a ni a, tun thlengin Bangladeshi tam takin an la hua.
“Keini hian, mi mal leh party angin, tihpalh tih loh engmah a bak tih kan nei lo,” tiin Jamaat-e-Islami hruaitu, Shafiqur Rahman-a chuan Islam-a thiam loh channa hnuhkir a nih hnuah a sawi.
“Kan lo tidik lo palh a nih pawhin in mi ngaihdam kan dil a ni,” a ti bawk.
An party member-te hi Hasina-i pa, Bangladesh ram dintu, Sheikh Mujibur Rahman-a kaihhruai, Awami League eptute an ni.
Hasina-i khan a sorkar lai khan Jamaat-e-Islami hi an awm a khap bakah an hruaitute pawh a man nasa hle.
May thla khan Bangladesh-a Muhammad Yunus-a kaihhruai sorkar lailawk ding mek chuan nikuma anmahni duh lotute an hmachhawn dan court-a chin fel a nih hma chu Awami League hi an awm a khap rih ve mek thung.