Disaster Management & Rehabilitation Minister Prof. Lalnilawma leh Horticulture Minister C. Lalsawivunga ten nimin khan tun hnaia ruah sur nasat vanga Aizawl khawpui chhunga lei chet nasat deuhna hmun hrang hrang an tlawh.
Minister pahnihte hian Aizawl khawpui chhunga veng paruk – Venghlui lei chetna hmun, Assam Rifles biak in tlanga Dawrpui (Temple – Vaivakawn) road lei chetna, Mission Veng Kawltheihuan lei chetna, Mission Vengthlang (Shalom Baptist Biak In – Tlawng road)-a lei chetna, Kulikawn Vengthlanga lei chein in pakua a khawihna leh Vaivakawn Zohnuai-a lei chein in paruk a khawihna hmunte an tlawh.
Vaivakawnah hian Aizawl West II bialtu MLA Lalnghinglova Hmar chuan a lo dawngsawng a, hmalak nghalna tur pawimawh hmasa an sawiho nghal.
Heng hmun hrang hrang an tlawhnaah DM&R Minister Prof. Lalnilawma chuan tun hnai ruah surin Aizawl khawpui mai bakah Mizoram hmun hrang hranga chhiatna a thlen chu pawi a tih thu a sawi.
Harsatna tawktu chhungkuate a tawrhpui thu sawiin Prof Lalnilawma chuan, in sa tur leh in sa tawhte pawhin tui chhia leh thli paihna tuihawk luankawr tha tak siam a pawimawh thu sawiin, “Sorkarin in satute zawm tur dan a siam chu tha taka kan zawm a pawimawh a ni,” a ti.
DM&R minister chuan Aizawl khawpui chhunga lei chet nasatna hmun hrang hranga mi an tlawhte chu sorkarin joint inspection team endik turin ruahmanna an siam thu leh an tlawh ni la la hian an chet chhuah nghal thu sawiin, an report pawh a rang thei ang bera thehlut tura an inhrilh thu a sawi a. Sorkarin theihtawp chhuaha bawhzui nghal a tum thu a sawi bawk.
Minister C. Lalsawivunga pawhin ruahtui lo dawnsawn kawngah fimkhur a tul thu leh tuihawk luan kawr mumal tak neih theuh a pawimawhzia sawiin, bawlhhlawh a bik takin tawihtheilo paih kawngah an fimkhur a ngai lehzual tih a sawi.
Minister-te hi DM&R Secy, DC leh a thawhpuite, Geology & Mining, PWD, PHE, P&E, AMC, UD&PA, DIPR official-ten an tawiawm a, an kalna hmun apiangah bialtu MLA, corporator, local council hruaituten an lo dawngsawng a ni.