Aizawl: Mizo ziakmi langsar, Padma Shree pawh lo dawng tawh Lalthangfala Sailo chu Pathianni zan dar 7:40 khan kal tha lo avangin a thi a. Nimin khan vui liam a ni.
Lalthangfala Sailo hi July 6, 1933 khan a piang a. June 21, 1962 khan Lalhrimi Sailo nen inneiin, fapa pathum leh fanu pakhat an nei a ni.
Zirna lamah MA niin, hun eng emaw chen Shillong-ah lecturer hna a thawh hnuah, kum 1973 leh 1985 chhung khan Govt Champhai College-ah Principal a ni a. Kum 1985 atanga kum 1996-a a pension thleng khan NEHU Mizoram Campus-ah Deputy registrar hna a thawk a ni.
Lalthangfala Sailo hian kum 1959 khan ‘Sangi Inleng’ lemchan thawnthu a tichhuak a. He lemchan hi Mizo irawm chhuak lemchan hmasa ber a ni a. Thuziak mai bakah AIR leh Doordarshan-ah te thu a sawi thin bawk.
Thu leh hla lama a tui avangin ram pum huap chawimawina chi thum – Sangeet Natak Akademi Award (1927), Padma Shree Award (1929) leh Bharat Adivasi Drama Award (2012) a dawng a. He’ng bakah thuziak lama Mizote chawimawina sang Mizo Writers Award, Pu Buanga Award, Mizo Academy of Letters (MAL) Award leh Mizo Drama Award te a dawng bawk.
Lalthangfala Sailo hian kum 2024 atang khan kal (kidney) tha lo natna a nei tan a. Hemi atang hian harsatna hrang hrangin a bawm a. Inrinni liamta khan a nak leh pum a nat avangin Synod Hospital, Durtlangah panpui a ni a, ICU khum ruak a awm mai loh avangin Agape Multi-Speciality Hospital, Chanmari panpui niin, damdawi lama mithiamte’n theihtawp chhuaha an enkawl hnuah Pathianni zan dar 7:40 khan a thi a ni.
A ruang hi Pathianni zan khan Chaltlanga an chenna inah lumen a ni a. Nimin khan Chaltlang Presbyterian Kohhran Hall-ah vui a ni.