Borussia Dortmund chuan Sunderland midfielder Jobe Bellingham-a lak theih ngei an inbeisei.
Kum 19 mi hian kum 2017 hnua a vawi khat nan Premier League-a Sunderland a kaipui leh hnuah Europe hmun hrang hrang atangin ngaihventu a nei a. Hetih lai hian German club hi a duhtu zinga hmahruaitu nia ngaih an ni.
Sunderland nena inbiakna la awm lo mah se Bellingham-a hian a unaupa, Jude-a hniakhnung zuia zawm a duh a, inremna pawh an neih thuai beisei a ni.
Dortmund hi season tawp lamah che thain hei hian player lak luhna kawngah pawh rah tha a chhuah nia ngaih a ni.
Bundesliga-a inkhel vawi riat a la awm khan Dortmund hi 11-na niin a sang palia tel turin point 10-in an la phak lo.
Inkhel vawi sarih zet chak zuiin vawi khat an hnehtawk a, an hnehtawk hi champions Bayern Munich an ni a, palinaah kaiin season tharah Champions League an khelh theih phah dawn.
Dortmund hian kum 2020 khan Jude Bellingham chu Birmingham City atangin an la lut tawh a, kum thum chhungin vawi 132 khelhsakin Erling Haaland leh Jadon Sancho te nen kum 2021 khan German Cup-ah an champion nghe nghe.
Kum 2023-ah Real Madrid a zawm a, Bundesliga nomawi a la hman lo va. 2022-23 season inkhel tawp berah Mainz an hmachhawn tumin hliam a neih ve avangin a khel lo va, chak se Dortmund hi kum 11 hnua champion thei an ni nghe nghe.
Jobe Bellingham-a hi thla hmasa khan Championship-ah Young Player of the Year atan thlan a ni a, kum nga kal ta khan Jude pawhin he chawimawina hi a lo dawng tawh bawk.
Sunderland-in Championship play-off final-a Sheffield United an hneh hnuah Championship team of the season-ah a tel phak bawk.