Aizawl: Mizoram Merchant Association (MIMA) hruaituten nimin khan Mizoram Co-operative Apex Bank Ltd. Chairman Lalnunsanga chu a pisa-ah an kawm a, APEX bank atanga loan latute hnena tun hnaia AMC atanga an trade license leh GST pekna hnuhnung ber document-te pe tura an phutna titawp turin an ngen.
An inkawmnaah MIMA hruaitute chuan, GST Council Of India chuan kum khata Rs nuai 20 turnover nei lo tan GST register a ngaih loh thu a sawi angin, sumdawng tam takin inziaklut lo an awm a. Hengte avang hian Mizoram Co-operative Apex Bank Ltd. in loan late hnen a AMC trade licence leh GST pekna hnuhnung ber an phut chu titawp turin an ngen a ni.
MIMA hruaitute chuan AMC licence-ah hian Mizo hnam himna a awm loh thu an sawi a. AMC trade licence a chhuah kum, kum 2012 atanga tun thlengin AMC Licencing Regulations chu him zo loa an la hriat reng thu an sawi.
AMC Licencing Regulations in a phut, heng – Voters ID leh Residential Certificate te hi Mizoram tih a ni lo a, India ram chhung khawi laiah pawh a hman theih avangin Mizoram voter’s ID leh Permanent Residential Certificate Of Mizoram hman ngei ni se an tih thu an sawi bawk a. Kum hnih chhung ILP nung an phut ngai loh chu phut tura an duh thu an sawi a. Hei bakah hian dawr inkharchhawn emaw, eng emaw dik lo a awm loh nan building neitu voter’s ID phut turin an ngen bawk.
APEX bank chairman Lalnunsanga hi Mizoram Co-Operative APEX Bank Director, CEO, General Manager leh Chartered Account te’n an tawiawm a ni.