Aizawl: India ram state dangte rualin Prime Minister Narendra Modi kaihhruai BJP-in kum 11 chhung sorkarna an chan chungchang workshop chu BJP Mizoram pawhin an pisa-ah an buatsaih.
He huna thusawitu BJP Mizoram President Vanlalhmuaka chuan, India ram retheihna avanga dinhmun chhe taka awm tawh chu PM Modi tumruhna leh thawhrimna avangin kum 11 chhunga khawvel economy tha ber palinaa a hlangkai chu lawmawm a tih thu a sawi a. BJP sorkar chu Mizoram pawhin nasa takin a chhawr tih a sawi.
Vanlalhmuaka chuan June 9-21, 2025 chhung hian India ram hmasawnna hrang hrang thleng chanchinte chu Mizorama chhungkaw tinte hnena hrilh hriatna atana campaign an neih tur thu a sawi a. PM Modi hnathawh avanga Mizoramin kawng hrang hranga hmasawnna a neihte leh PM scheme kaltlanga chhungkaw tam takin tanpuina an dawn avanga hma an sawn dan te chu an auchhuahpui dawn tih a sawi a. Mizoramah hetianga Modi thilpek PM Scheme dawngtute zawn chhuah a, chung miten an thil dawn petu chu PM Modi a nih thu inhrilh hriatna hun hi tha taka kalpui turin an mawhphurhna a nih thu a sawi.
He hun hi biak hmuh theih hmangin BJP MP (Lok Sabha) Kamakhya Prasad Tasa chuan hmanpuiin, ram pumah PM Scheme hrang hrangte chu mipuiin anihna anga an hriat theih nana ‘11 Years of Modi Government’ hun an hman chhung hian khaw tinah, district tinah an theh darh a, PM Scheme kalphung leh a nihna takte chu Mizoram mipuiin an hriat tam a tul thu a sawi bawk.