Aizawl: Chief Minister Lalduhoma’n nimin khan a bial Serchhip chhung khuaa tun hnai ruah sur nasa avanga chhiatna thlenna hmunte a tlawh.
Chief Minister hian Serchhip, Buangpui, Neihloh leh Thenzawla chhiatna thlenna hmun hrang hrangte a tlawh a. He’ng khuate a tlawhnaah hian sorkar hotute leh khawtlang hruaitute nen an inkawm nghal zel.
Khaw hrang hranga khawtlang hruaitute nena an inkawmnaah hian bialtu MLA chuan, chhiatna leh harsatna a lo thleng laka hma an lakna tinrengah Serchhip DC leh a thawhpui te, official-te, tlawmngai pawl leh khawtlang hruaitute chungah lawmthu a sawi a. Heng khuarel chhiatna a lo thlen hian an intanpui a, an inpeizawn liam liam a ngai thin. Tun tum chhiatna vanga hnam dang khualzin, kawnga tangkhangte pawhin Mizo mipuite chet dan an fak viaua a hriat thu leh an inpuihtawn thinna ri hi a ring hle tih a sawi.
Bialtu MLA chuan sorkarin theihtawp chhuahin hma a la zel dawn a, vanduaina tawkte hnena tanpuina pek tur chite pawh a rang lama pek zel an tum thu a sawi a. Sorkar laipuiah pawh a rang lama an thlen tur thu sawiin, sorkar hmalak dan tlangpui a hrilhfiah bawk.
Serchhip DC Paul L. Khuma tarlan danin, ruahsur nasa vang hian Serchhip district-ah in chhe vek 25, chhe nasa 19, a then lai chhia 18, hmun him zawk pana insuan chhuak chhungkaw 108 leh leimin 150 a awm a. Leihlawn (bridge) panga, Public water tank pahnih leh tuikhur 18, retaining wall chim 20 a awm a ni.