MPYCC chuan nimin khan Chanmari leh Bawngkawn inkar kawng, PWD-in bituminous concrete (BC) hmanga a thawm that hna an thawh mek an tlawh.
Kawng an tlawhnaah MPYCC Sr. Vice President Ngurdingpuia Pachuau chuan kawng chhia avanga rei tak harsatna tawk tawh, chhim lama ATL riah siamna tur pawt peng a, kawng tha sa zawh hrehawm khawpa siam a ni chu a thlangtu mipui pawisak lohna lian tak a nih thu sawiin, “ZPM sorkar hian eizawnna atana hmang leh lirthei ke hnih nei khalhtute tan thang an kam a ni,” a ti.
Ngurdingpuia Pachuau chuan tun hma zawnga kawng chhe siam tura a hawnna la buatsaih ngai loh, traffic ti jam khawpa ribbon chep chat meuhin PWD minister-in a hawng a. Kawng chhe siam tha tura hmalatuten kawng tha sa an ti chhe vek a. Lirthei ke hnih nei chi phei chu an tlu nasa a, hliam tuar leh lirthei chhiat phah pawh an awm nual tawh, tiin, ZPM sorkar hian Mizoram inkalpawhna kawngpuite ICU-ah an dah mek a, kawng chhia an siam tha lo va, kawng tha sa an tichhe zo zawk tih a sawi.
PWD Minister Vanlalhlana’n Zuangtuia Hot mix plant tihchhiat avanga kawng siam hna thawh chhunzawm a harsat thu a sawi chu thil zahthlak tak a nih thu sawiin Ngurdingpuia Pachuau chuan, “He an khawl chhia hi kawng siam chungchangah chhuanlam a tling lo,” a ti.
Hot Mix plant chhiat chungchangah mipui a dem chu mahni chanvo hre lo anihzia a pholang a, midang kuta a chanvo (PWD minister) a nihna hi hlan ngam zawk tura a ngen thu a sawi.
Aizawl khawpui chhung kawng thawmthat hna thuang hniha kalpui turah tute emaw sum siamna atana hman a nih leh nih chuan Congress thalai chuan uluk taka an enzui a, a vil zui zel dawn tih a sawi bawk.