Aizawl: MZP, Hnahthial headquarters huaihawta Hnahthial district chhunga HSLC leh HSSLC tithate lawmpuina hun buatsaih chu South Tuipui bialtu MLA Jeje Lalpekhlua’n khuallian niin a hmanpui.
Horeb Lodge Conference Hall-a lawmpuina hun buatsaihah hian Hnahthial district chhunga distinction a pass, zirlai 14-te hnenah lawmpuina thilpek hlan niin, zirlai pass kim nei, sikul pasarih hnenah lawmpuina hlan an ni bawk.
Inkhawmah thu sawiin bialtu MLA Jeje Lalpekhlua chuan zirlai pass tharte a lawmpui thu sawiin, tuna an hlawhtlinna chu a bultanna tur chauh a nih thu a sawi a. An thil tihna apiangah chhawr tlak ni tur khawpa thiamna nei tur leh an thiamna leh theihnate chu khawtlang leh ram tana hmang chhuak turin a chah.
Bialtu MLA chuan taimakna tello chuan hlawhtlinna tak tak a neih theih loh thu sawiin, an thil tihna engkimah midangte ai nasa a thawkrim turin a chah a. Mithiam tak tak ruihhlo avanga hman tlak loh an tam thu sawiin, zu leh ruihhlo laka fihlim tlat turin zirlaite a chahin, Hnahthial district tan zirna in tha leh quarter tha te an siam dawn niin a sawi bawk.
Zirlai tithate lawmpuinaah hian Chhinkhanmanga Thomte, General Secretary, MZP Gen. Hqrs, Aizawl chuan Uaptu niin thu a sawi a. Lawrence Lalhlanthara, SDC pawhin thu a sawi bawk.