Kan state thenawmte nen ramri chungchangah kan lo buai fo tawh thin a, Assam lam nena kan buaina phei chu silai hial puah tawhna a ni.
Kan state thenawmte nena kan ramri chin hi fel fai taka siam a awm thlip thlep lo pawh a ni thei. Mahse, kan ramri chin nia kan hriat leh kan document neih ang ang hmanga kan hriat theih chin hi chu kan hauh na hle tur a ni.
Assam nen kan buaina a tawp hlei thei lo a, a khat tawkin kan ri leh hluai thin bawk. An political party te’n politics khelh nan, an ram mite rilru suk sak nan an ti ri leh hluai thin nite pawhin a lang thin a, kan lo ngen ve ngalh zel pawh a tul hle.
Tunah Tripura nena kan inrina lamah harsatna kan tawk leh a, kan ram chin min luahsak tum niawm takin hmalakna an nei reng a, zirlai pawlte hial pawhin a hmunah an lo en tawh a nih kha.
Tripura nena kan ramri chin pawh hi kan humhalh a tul hle a, sorkar hian dawhkan ringawta inla pawr lovin, a sipaite hi dah nghet tha in, a tul chuan silai pawh tipuak thei mai turin thu pe se la, kan pi pute sahzau sa kan ram hi i humhalh tlat teh ang u.
Tin, ramri kalpawhna kawngpui reng reng hi kan chakkhai lakna hnar pakhat a nih bawk avangin khawii lai pawh hi thawm that niin, siamthat ni hlawm se la, kan ram humhim nan leh inkalpawhna kawnga harsatna kan tawh loh nan kan kawngpuite hi chei hnum that ni mawlh teh se.