Ministry of Housing and Urban Affairs (MoHUA) ruahman angin nimin khan ‘World Environment Day’ denchhena AMRUT Mitra (AMRUT leh DAY NULM tangkawp) hnuaia thingphun rûnpui ‘Women for Trees’ campaign hawnna hun hman a ni; UD&PA Minister K Sapdanga’n a hmanpui.
BSUP Complex, Lawipu-a hawnna inkhawmah Minister K Sapdanga chuan sorkar laipuiin thing phun tam kawnga hma hruai tura a ruat, hmeichhe Self-Help Group (SHG)-te chu he hna thawk tur hian an chak tawk tih a sawi a. Khawvel boruak chhiain a ken tel, khuarel chhiatna tam tak lakah thing phun hmangin an inveng thei, tiin, SHG-te chu ram pumpui eizawnna bultanna atan an pawimawh thu leh hlawhtlinna atan hausak aiin ngelngheh a pawimawh zawk thu a chah.
UD&PA Director Jacob Lalawmpuia kaihhruai inkhawmah hian UD&PA Secretary Lalmalsawma Pachuau chu khual zahawm niin, SHG member thlanchhuah 27-te hnenah thingphunna tura an mamawhte a sem a. UD&PA Joint Director (Plan) Andrew Lalhruaia’n thu a sawi bawk.
Ruahman dan chuan ‘Women for Trees’ programme-ah hian SHG 112 atangin member 517-ten thingtiak 1149 an phun dawn a. Phase-I hnuaiah thingphunna hmun tur thlan fel tawh niin, Mizoram-ah chuan khawpui 10-ah, hmun 46-ah phun tum a ni a. Aizawl bikah chuan BSUP Complex pathum (Lawipu, Edenthar leh Durtlang) bakah RAY Complex, Falkland-ah thing hi phun tura ruahman niin, Phase-II chu nimina bultan tak, a taka thingphun tan a ni a, ruahman ang chuan August thla thleng a awh dawn a. Phase-III hnuaiah chuan SHG member-ten thingphun hi an enkawl chhunzawm dawn a ni.