Aizawl: June 6 hi khawvel pum huapa United Nations in a kalpui thin ‘World Environment Day’ a ni a, he ni denchhen hian PHE Department leh Central YMA tangkawpin Tuikual lui an thianfai.
Tuikual lui then fai hnatlang tan a nih hmain PMU, PHE Department office, MINECO tualah khuh hawnna neih a ni. PHED E-in-C Er. Zodinthari chuan khuallian niin telpui a. Hnatlang turte a vai liam.
PHED Project management Unit Director Er Lalropuia kaihhruai khuh hawnnaah hian khuallian Er Zodinthari chuan, Central YMA leh PHE department an thawk ho thei chu lawmawm a tih thu sawiin, faina leh thianghlimna kawnga Mizoramin hma a sawn zel theih nan thawhhona tha an neih zel a pawimawh thu a sawi.
He hunah hian Er Lalrinzuala Secretary, PHED & CYMA Co-ordination Committee leh Central YMA President Lalhmachhuana te’n thu an sawi a. Er Ngentluanga, Chief Engineer Zone 1, PHE Department kaihhruaina hnuaiah thutiam (pledge) sawi rualna hun hman a ni bawk.
Hnatlangah hian YMA atangin Branch pasarih – Tuikual North leh South, Dinthar, Chawnpui, Ainawn, New Capital leh Maubawk branch YMA te atangin hnatlang an chhuak a. SBM (G) ambassador Zira PC bakah PHE Department thawktute nen an vaiin mi 200 chuang an hnatlang a ni.
UN General Assembly chuan kum 1972 khan June 5 hi World Environment Day atan a puang a, kum 1973 atamg khan thupui thlan bik neiin hman tan nghal niin, kumin hian ‘Ending Plastic Pollution Globally’ tih chu thupui atan thlan a ni.