Aizawl: Mizoram chhung hmun hrang hrangah nimin khan World Environment Day hman a ni a, District tinah Samagra Shiksha District Project Office te bul tumin he ni hi hman a ni bawk.
World Environment Day-ah hian India ram pumah thingphun campaign hming atan hian ‘Ek Ped Maa Ke Naam 2.0’ (Nute puala thingphun) tih hman a ni. Kumin thupui atan hian ‘Plastic bawlhhlawh tihtawp’ tih hman a ni.
June 6-September 30, 2025 chhungin India pumah kalpui a ni dawn a, forest department nen tangrualin sikul tinin thing tiak 70 phun tur a ni a, India ram pumah thing tiak vaibelchhe 10 phun tum a ni.
Sikulah te hian Eco Club for Mission Life din a ni a, a la din lo pawhin din tura hmalak chhoh mek a ni. Eco Club te hian an school hungchhung emaw, hmun dang remchangah emaw thing tiak an phun zui dawn a ni.
Nimin khan Samagra Shiksha Aizawl District Project Office leh Aizawl District Level Plantation Committee tangkawp buatsaihin World Environment Day hi hman a ni a, Addl. Deputy Commissioner Zoramsiama Hmar kaihhruaiin zirtirtute leh naupangte Govt Central Higher Secondary School-ah hun hman a ni a, thing tiak phun bakah plastic bawlhhlawh that lohna te leh thingkung pawimawhna te inhrilh thar nan hman a ni.