- Dr. J.T. Vanlalngheta; Advocate, Writer’s Lexis & Law
Thupuia ka’n hman ang chi hi chanchinbuah ka lo ziak zauh zauh tawh a, tlem ha’n sawi belh leh ila.
Kum 1985 a lo inher chuak a, remna leh Muanna a thlen thuai theih nan na taka Sawrkar Laipui nawr a ngai tih zir laite chuan an hria a; tichuan, May ni 7, 1985-ah kha tih laia zir lai pawl awm ang ang (legal) te: All Mizo College Students (AMCSU), SCAP, Mizo Students Federation, etc chu Aizawl College-ah inhmu khawmin:
- Kan unau ram hnuai mi (MNF underground)-te koh chhuah nan
- Remna a thlen thuai theih nana chak taka Central Sawrkar nawr nan.
Pawl hming hrang hrang rawt chhin zingah Students’ Joint Action Committee (SJAC) chu pawm a ni ta a ni. MZP kha a awm a rem loh avangin a mi mal ang zawngin ka thai lang lo mai a ni.
He pawl hian remna leh muanna a thlen theih nan nasa taka beiin School hrang hrang leh College hrang hranga zir laite sawm chhuakin Sipai Lam Mual leh Treasury Square-ah te chaw ngheiin Govt of India chu an nawr ta tak tak a, a ropui hle. Chumi hunah chaw ngei tur, chumi niah bandh neih tur, etc tih te kha kan thupui hlapui a ni.
Kei chu thil dangah tangkaina nei ve lo mah ila, zir laite chaw ngheipui leh a tul anga kan hotute kaihza ven chu ka tih theih ve chhun a ni. SJAC thu leh hla chhuak ang angte English-a letlinga thir hrui hmanga Ministry of Home Affairs, etc-a thawntu Tv H.Lalengmawia, BA (Hons) zir lai ka tawiawm thin chu ka hna deuh ber a ni maithei. Kan SJAC Joint Secretary Mawia hian Sap tawng a thiam a, a nihna tur dik taka awlsam taka Sap tawng thu mal rema, han phuah thei mai zel a ni kha SJAC khan kan tangkaipui hle a ni.
SJAC hma lakna avang khan mi tam takin Jail an tan phah a, mahse, remna a thlen phah avangin hrehawm tuarna anga lang tur pawh kha mal sawmnaah a lo chang ta a ni. Kan hruaitu zinga mi C.Lalenga phei chu mi dangten donation an khawnah voucher-ah a hming tumtua an lo hman avangin ni 13 zet chu Jail chhungah hun a hmang a, chhuahtir tura beih pawh kha hautak tak chu a ni.
SJAC-ah hian zir lai dik tak ni lote nen kan inpawlh sawp avangin thenkhat chuan he Zirlai Pawl chanchin hi sawi nuam an ti vak lo a ni maithei. Ni danga ka ziahah khan hruaitu ka hriat ang angte zir lai ni lo chunga telte nen ka rawn thai lang vek a, tun tumah erawh chuan ka rawn ziak lang ta rih lo va, min lo hre thiam hram se, SJAC hmanga an rawng bawlnate kha hlu tak a ni. Tun tumah hian chawi mawi an nih loh pawha chawi mawi phu leh zofate hriat reng phu SJAC hruaitute, a dintute leh a hnu deuhva zawmte hming ka hriat ang ang, zir lai ni ngei chunga a mei-zang-hlaptua tangte ka’n ziak lang ve hrim hrim ang e:
- R.F.Muana (L)
- Lalrinliana Sailo
- H.Lalengmawia
- C.Lalringliana
- J.K.Dawngzuala
- C.Vanlallawma
- C.Lalenga
- LN Chhangte
- Vanlalhmuaka Sailo
- H.Lalthlangliana
- K.Hrangzuala
12.Thangchemsanga - Lalsanga Sailo (L)
14.J.T.Vanlalngheta.
Khang hun laia remna ngen nana zir lai chaw ngheite kha in hlu tak zet a, in chaw nghei kha lawmnaah a lo chang a ni. In thil tih kha a thlawn lo va, thangthar lo awm zelten an hre reng ang.
‘Remna Ni’ lawm apianga hruaitute hming sawi lan a ni ngai lo hi thil mak tak zawng a ni, thup atana tha zawk a awm vang em ni angt Rilruah zawhna a awm. Kan hruaitute hming hi sawi lan ni lo mah se, Students’ Joint Action Committee (SJAC’s legal personality) ropui tak (dik tak chuan remna thlen nana immediate cause-a thawk rim ber), he movement Mizorama ti alhtu hming rinngawt pawh thu sawitu CM hluiten Remna Ni lawma an sawi lang ngai lo hi he pawl hruaitute leh member-te tan chuan a mak angreng hle; Pu Lalduhoma chauh lo chuan an sawi lang ngai miah lo hi chu rilru a na dawn mai.
Eng pawh ni se, ringtute kan ni vek a, remna kan neih pawh kum 38 vel zet a lo ni ta a, Remna hnuaiah inrema inngeih dial dialin, Lal Isua Chanchin tha ât chilha hril zel hi kan zaa tih tur leh hna pui awm chhun chu a ni ta. Ram buai laiin zalen taka Chanchin tha Hril a theih si lo.
SJAC hna thawh hi kan hriat dan inang lo a awm nual thei a, a hun lai hre pha chin leh kha movement-a tel ngeite khan rawn ziak ve zel ula, Mizo Chanchin hlu tak zinga mi a ni ngei ang.