Nipui thaw mekah North America khawchhak lam chuan a tum khat nan khaw lum uchuak tawngin mi eng emaw zat damdawi ina dah ngai an awm phah.
Thawhtanni khan Paterson, New Jersey-a pawna school graduation ceremony hman laiin mi 150 chuan khaw lum lutuk avanga harsatna nei an awm niin US chanchinbuten an tar lang a, mayor-in emergency a puang nghal.
Washington DC-ah South Korean band ‘Stray Kids’ concert chhimtu mi paruk chu damdawi in panpui ngaiin an awm niin CBS News-in a tar lang.
Tun kar chhunga khaw lum tur hi US Midwest atanga East Coast inkar bakah Canada-a Ontario, Quebec leh Nova Scotia tan sawi lawk mi maktaduai 160 chenna huam a ni.
US khawchhak lam vaukam hrul chhim lam deuh, North Carolina-ah pawh mi eng emaw zat khaw lum lutuk avanga damlo an awm.
Tual chhung chanchinbute chuan naupang telin min 41 vel North Carolina lailiah damdawi ina dah ngaia an awm thu an tar lang.
Mi thiamte chuan North America-a khaw lum hian khaw lum lutuk kaihhnawih damlohna a thlen thei tih an sawi lawk a, a bikin boruak uap lutuk awmin harsatna a siam zual niin an sawi.
Chhun lama a lum piah lamah zanah pawh khawchhak lam khawpui tam takah chuan 27°C chung lam a la ni hlawm.
Khawchin zirtute chuan nipui a thlen tak tak hma chawlhkar khat tling lo deuhvah khaw lum uchuak hi a thleng niin an sawi a, hmun tam tak chuan record an siam dawn niin an sawi lawk.
US National Weather Service (NWS) chuan mipuite chu ‘lum tih avanga harsatna nei anga an awm chuan hma la thuai turin’ an ngen a. Ni sat lai chuan in chhunga awm tam tur te, tui in tam tur te leh kum upa leh hriselna chak lo deuhte dim zual turin a ngen.
North America hmun tam tak hian nipuiah khaw lum tak hi an lo tawk ve ziah a, tun tumah hian hmun tam tak chuan June-a lum lam record an lo neih sa an khum nual tawh.
New York-ah chuan Thawhlehni khan 38°C tlingin kum 1966-a chhinchhiahna an neih hnua June-a a lum ber tum a nihrual.
Energy company-te chuan khawchhak vaukam hrula chengte chu power ren turin an ngen.