Aizawl: School Education Directorate Conference Hall-ah Adult Education Wing-ten thlakip chhuak Meichher magazine an tihchhuah thin, Golden Jubilee lawm nan nimin khan Zoram Entu Meichher Seminar neih a ni.
Seminar hawnna inkhawmah School Education Director Angela Zothanpuii chuan thusawiin, Meichher chanchinbu thiltumte chu nghet takin an vuan reng tih a sawi a. Meichher Golden Jubilee lawm kum takah Mizoram chu ziak leh chhiar thiam full literacy a puan a ni ta chu Meichher thiltum hlawhtlinna ropui tak a nih thu leh, a tirte atanga buaipuitu R. Lalrawna chu literature & Education huangah Padma Shree Award hlan a lo ni leh chiah te hi Meichher chanchinbu hlutna tarlangtu a nih thu a sawi.
Inkhawmah hian Meichher Editor T.C.Lalremsiama chuan, ‘Meichher’ chu a tirah chuan ‘Zoram Eng’ tiin tihchhuah a nih thu leh, kum 1975 March & April thla chhuak kha a bul tanna ni mah se, a tulna leh remchan zawkna avangin October 1975 chhuak atangin ‘Meichher’ tia a hming thlak a nih thu a sawi a. Kum 1975 March & April thla chhuak atanga chhiarin June 2025 chu bu 808-na a nih thu a sawi.
TC Lalremsiama sawi danin, Meichher hi sorkar sum sengin a tir atangin thla tin bu 3000 zela tihchhuah a ni a, a thlawna sem a ni. COVID-19 leng harsatna avang khan ‘Meichher’ pawh thla eng emaw zat chhung chu bu 2,800-a tihchhuah a ni a; mahse, November 2022 thla atanga tun thlengin bu 3,000-a tihchhuah zui a ni leh ta a ni.
Meichher Publisher atan tihchhuah tan tirh atangin department hotu ber Director chu tun thleng hian hman a ni thin a ni.
Seminar-ah hian thupui hrang hrang pali zirho a ni. Book of the Year 2024 Awadee F. Vanlalrochana ziah ‘Meichher Tihlutute’ tih te, Dr. C. Lalawmpuia Vanchiau, Asst. Professor, Helen Lowry College ziah ‘Mizo Literature atana Meichher Magazine hlutna leh tangkaina’ tihte, R. Lallianzuala, Chairman Mizo Language Development Board (MLDB) ziah ‘Mizoram zirna (education) atana Meichher Magazine tangkaina’ tih leh Dr.H.Laldinmawia, Head, Department of Mizo, PUC ziah ‘Meichher Magazine Zir chianna’ tihte zirho a ni.