Aizawl: Dr. K. Beichhua, MLA chu BJP Mizoram State President thar atan puan a ni a. Kum 2027 thleng nihna a chelh ang.
Thawhtanni khan Central BJP-in National Returning Officer atana ruat, BJP National Mahila Morcha President Vanathi Srinivasan chuan Atal Bhawan, Aizawlah president thar atan , Siaha bialtu MLA Dr K Beichhua thlan a nih thu a puang.
Pathianni khan president thar thlanna neih tura tih a ni a; mahse, inthlana chuhtu awmchhun chu Dr K Beichhua a ni a. President nihna term hnih lo chelh tawh, Vanlalhmuaka a thlak a, president term hi kum thum a ni.
President thar puanna inkhawmah president thar chuan kalchhuak ta, Vanlalhmuaka leh state hruaitu lo ni tawhten harsatna hrang hrang paltlanga an sut eng saah president a ni tur chu lawmawm a tih rualin a huphurh hle tih a sawi.
Dr K Beichhua chuan, an party chu a bulthut atanga tihchak a ngaih thu a sawi a. Unit tam zawk nei thei turin hma an la chho zel dawn tih a sawi.
Vanlalhmuaka pawhin president thar chu Mizoramah hmasawnna a thlen theih nan an thawhpui a tul thu leh an thlawp tlat tur thu a sawi.
Dr K Beichhua hi kum 2013 leh kum 2018 MLA inthlanpuiah MNF ticket-in Siaha bial atangin thlan tlin a ni a. MNF kaihhruai Mizoram sorkarah Minister of State lo ni tawhin Social Welfare, Excise & Narcotics, AH&Vety leh Sericulture department te a lo enkawl tawh a, December 13, 2022 khan khatih hunlaia Chief Minister Zoramthanga thurawn angin, minister atangin bânna a thehlut a, January 2023 khan MNF chuan an party kalha chea puhin an party primary member atangin chawlhtir a ni leh a. Hemi hnu hian BJP a zawm a, kum 2023 Mizoram Assembly inthlanpuiah khan Siaha bialah BJP ticket-in a ding a, hneh taka thlan tlin a ni.