Central YMA hnuaia ruihhlo do pawl – Central Anti-Drugs Squad (CADS)-in ruihhlo an mante chu nimin zing khan Tuikhuahtlanga Central YMA pisa tualah tihral a ni.
Ruihhlo tihralte hi CADS-in March 15 atanga June thla thlenga an mante niin tihral zawng zawng belhkhawm hi Rs nuai 429.27 man hu a ni.
Ruihhlo tihral puala inkhawm kaihruaitu Central YMA President Lalhmachhuana chuan tihralte chu CADS-in police leh excise-a an hlan bâng a nih chu a sawi a, thenkhat hi chu a neituten an tlanchhiatsan a nih thu a sawi.
Central YMA Secretary Prof. Malsawmliana tar lan danin ruihhlo tihral hi No 4 heroin hawng 861 leh tictac 1,498, meth kg 10, damdawi tablet 25,383, ganja kg 56, khuh damdawi codein tel bur 2,805 bakah zu tam tham tak an ni a, Rs. 429.27 lakh man hu a ni.
March 15 atangin CADS hian ruihhlo kaihhnawihah mi 809 an man tawh a, heng zinga 440 councelling pek niin, 37 chu ruihhlo ngaite enkawlna home-ah an dah a, 48 chu excise-ah an hlan a, Police kutah mi pali hlan an ni bawk.
Ruihhlo tihralna hun hi Chief Minister Lalduhoma’n hmanpuiin ruihhlote hi tuiah a chiah ral a. A tam tham avang leh khaw chhunga tihral a him loh theih avangin a bâng zawng hi CADS member-ten hmun dangah an tiral zui a ni.