Aizawl: Hmarchhak state pasarih chief minister-te leh an aiawhten 16th Finance Commission member-te nimina an kawmnaah Mizoram Chief Minister Lalduhoma’n Mizoram mamawh hrang hrang a thlen.
New Delhi-a Imperial Hotel-a an inkawmnaah Mizoram chief minister chuan state sum bawm lian ber (devolution of taxes) tihpun chungchangte, central sorkarin state sorkar hnena pawisa a pek dawnin mihring tam lam chu criteria pakhat a nih avangin Mizoram ang mihring tlemnaah an tuar thin a, hemi kaltlanga sum hmuh tihpun a nih theihna tur criteria a dah telte, chhiatrupna atana sum inpek thin hnuaiah chhiatna lian thamah lirnghing, khawkheng, cyclone leh tuilian dah thin chu Mizoramin a tawrh nasat leimin, ram kang leh ruahbawhawk avanga chhiatna thleng te telh ve tura ngennate, Mizoram chu tlangram chhengchhia leh inkalpawh harsatna anih avangin bungraw phurhna senso chhut tel thin tura ngenna leh district council-te tana sum tam zawk pe tura ngenna bakah rural local body grant chhunzawm zel tura ngenna a thlente chu a langsar zual an ni.
Thutkhawmah hian Mizoram chief minister bakah Meghalaya Chief Minister Conrad Sangma te, Tripura Finance Minister Pranajit Singha Roy bakah state dang chief minister aiawh leh official pawimawhte an tel a. Northeast state aiawhte hian dilna intawm Joint Memorandum chu 16th Finance Commission hnenah hian an thehlut nghal a ni.
Kum nga chhung atana ram danpui Article 280-na anga central sorkar leh state sorkar ten sum an insem dan tur duangtu, 16th Finance Commission rawtna (recommendation) hi nakkum April 1 atanga hman tan tur a ni a. 16th Finance Commission hian Mizoram pawh rawn tlawh tawhin, an hmalakna kal zelah nimin khan hmarchhak state chief minister-te nena inkawmna hun hi an buatsaih a ni.