Hezbollah chief chuan muanna a awm theih nan an inhawng reng tih a sawi a; mahse, Israel-in thlawhna atanga kah leh Lebanon chhim lam atanga a inhnuhdawh hma chu an pawl chuan ralthuam dah an tum lo tih a sawi.
“Israeli-ten min beih zel chuan keini chu kan tawlh thei lo va, kan ralthuam kan tung thei lo,” tiin Naim Qassem-a hian Beirut chhim lam-a Shia Muslim calendar-a an ni pawimawh pakhat, Ashura an hmannaah mi sang tel hmaah a sawi.
Ashura hi 680 AD Battle of Karbala atanga tan niin Prophet Muhammad-a tupa, Imam Hussein thah a nih champha a ni.
Beirut-a Hezbollah chakna hmunah chuan yellow banner tarin Qassem-a thu sawi lai hian an au nasa hle a. Qasem-a’n a thlak tak, Israel-in September thlaa an thah tak, Hassan Nasrallah-a thlalak an tilang nasa hle bawk.
Israel hian Lebanon hi October 8, 2023 khan an bei a, a hma ni chiahah Hezbollah sangawizawnpui, Palestinian pawl, Hamas-in Israel hi beiin mi 1,200 chuang thatin mi 251 hren turin an hruai bawk.
Israel hian Lebanon hi September, 2024 atang khan beiin mi 4,000 chuang an thi tawh a, an zingah Hezbollah-a hruaitu lawk tak tak an tel a. United States-in palai hna thawkin November-ah inkahhai an puang.
Inkahhai puan ni mah se Israel hian Lebanon chhim lama ramri hmun pawimawh panga an la luah a, Hezbollah an intihlen leh hlauvin ni tin deuhthawh thlawhna hmangin a la bei reng bawk a. November hnua an beihnaah mi 250 chuang thi awm tawhin mi 600 chuangin hliam an tuar bawk niin Lebanon-a health ministry chuan a sawi.
Qassem-a’n an inpek mai dawn loh thu a sawi lai mek hian US envoy to Turkiye & Syria, Tom Barrack-a chuan Thawhtanni khan Beirut a tlawh a. Lebanese thuneitute chuan US hian kumin kum tawpah Hezbollah-in an ralthuam an dun an duh tih an sawi tawh thin a. Israel pawhin ralthuam an dah lo a nih chuan Lebanon hi an la bei zel dawn tih an sawi bawk.