Aizawl: MNF founder president Laldenga thih champha vawi 35-na pualin nimin zing khan a thlan, Aizawl Treasury Square-ah MNF President Zoramthanga leh Laldenga fanu, Dr Renee Lalrinzuali hovin zahna chibai bukin pangpar an dah.
Inkhawm tawiah MNF president chuan, “Pathianin Pu Laldenga min pe hi Mizote vanneihna lungphum pawimawh ber zinga mi a ni. India mai ni lo, khawvela Mizote min pho langtu a ni a, khatih hunlaia Zofate mai ni lovin, thangtharte thinlung thlengin hnam thinlung a tuh a. Sawisela ngaihnep tum awm thin mah se, kan finna a sang a, Pu Denga hlutna hi kan hrechiang tulh tulh,” tiin, Mizo hnam leh Mizoram a awm chhung chu a hming a daih tawh loh tur thu a sawi.
MNF Vice President Lalchhandama Ralte kaihhruai inkhawmah hian Laldenga fanu pawhin chhungkaw aiawhin thu a sawi.