Fur ruahtui tla mekah Pathianni thleng khan Himachal Pradesh-ah chuan chhiatna nasa tak thleng tawhin mi 78 an thi tawh a, hetih lai hian an thenawm, Uttarakhand-ah pawh district paliah lei min lian tham thleng thei a nih avangin inralrinna tihchhuah a ni.
Himachal-ah hian June 20 atanga fur ruah an dawn hnuah sabereka khuang hmun 23, ruah bawhawk sur vawi 19 leh lei min hmun 16-ah a awm tawh.
Thi mi 78 zinga 50 chu ruah kaihhnawih chhiatna thlengah niin mi 28 erawh chetsualna thil avang a nih thu State Disaster Management Authority (SDMA) chuan a sawi.
Ruah vanga thihna thleng zingah hian mi 14 chu sabereka khuangkaihin a laka thi an ni a, tui tla pariat, electric-in a man pariat bakah lei min, tek tla leh rul chuk vanga thi an awm nual bawk.
Mi 37 chin hriat lohvin an la awm mek a, mi 115 hliam tuar an la awm bawk.
State chhungah thil chhia pawh a tamin a tuar na ber, Mandi district-ah chuan Himachal Cooperative Bank chhawng hnuai ber chu tui leh hnawlin a hnawh vek.
“National highway pahnih telin kawngpui 243 khar a ni a, electric pekna 278 chhia leh tui pekna chhia 261 a awm bawk.
India Meteorological Department (IMD) chuan Thawhlehni leh Nilaini hian ‘ruah tam tak sur’ turin an la sawi lawk a. District pathum – Sirmaur, Kangra leh Mandi-ah inralrinna sang ber leh district pasarih – Shimla, Solan, Hamirpur, Bilaspur, Una, Kullu leh Chamba-ah a sang ber dawt pek chhuah a ni.
Hetih lai hian Geological Survey of India (GSI) chuan district pali – Tehri, Uttarkashi, Rudraprayag leh Chamoli-ah lei min mai theihna tichhuakin Thawhtanni leh Thawhlehniah ruah a tam dawn tih an sawi lawk a. State Emergency Operations Centre (SEOC) chuan district magistrate, disaster management authority, police leh State Disaster Response Force (SDRF) te chu inring tura tih an ni.
Inralrinna tihchhuah a nih avangin Himalayan tlang dunga khualzin kal vel pawh khuahkhirh rih a ni a. Lirtheia kal bakah kea kalte pawh fimkhura a tul lova chhuak lo tura tih an ni.