Aizawl: Higher & Technical Education Minister Dr Vanlalthlana chuan ZPM sorkar hnuah advertisement tel lova hna lak a awm lo mai ni lovin, school leh college-ah unqualified teacher lak an la awm lo tih a sawi.
Thawhtannia ZPM party chhung inkhawmah thusawiin Dr Vanlalthlana chuan, MTET nei lo MR zirtirtu tam tak te pawh last chance pek mek an nih thu leh Samagra Shiksha hnuaia unqualified teacher awmte pawh zawn chhuah mek an nih thu a sawi a. “Dan laka sorkar himna turin uluk takin engkim zirchian a ni a, hemi nghak zo lo hian vawiinah kawng an zawh ta a, an duh angin a tih nghal vek theih loh a, sorkar chuan hma a la zel dawn tih erawh hria se ka duh hle,” a ti.
Dr Vanlalthlana chuan, “Hun inpe lova mi chaw bel ben buaksak hi sorkarin a duh loh avangin, dan zuiin sorkar chu a kal mai a ni. ZPM sorkar hnuah advertisement tel lova hna lak a awm lo mai ni lo vin, school leh college-ah unqualified teacher lak an la awm lo. Asst. Professor atan NET emaw, Ph.D nei lo dah ngheh nan file put up a awm tawh lo bawk,” tiin, sorkar hmasaah mit siai chunga zirtirtu lak ang chi leh induhsakna awm thin ang kha a thlen tawh loh thu leh ZPM sorkarah NET nei lote lak a nih dawn loh thu a sawi.
H&TE Minister chuan “Kum 2019-a lak, MR zirtirtu 800 chuang zingah qualified lo mi 100 chuang an awm a, qualified tam tak an awm tawh avangin tunah hian sorkarin last chance a pe leh mek. Sorkar hmasa khan kum 2024 thleng an qualify ve theihna turin hun an pe a ni. Heti a nih chuan MR teacher thenkhat, lehkha zir mek ten an tuar nghal dawn,” a ti.
“Zirlai pawlten sorkar hmasa hnuaia sawi awmzia nei lova an ngaih, aikal leh unqualified teacher chungchang an rawn au chhuahpui theih chhan chu, sorkarin huai taka hma a lak tak vang a ni,” tiin Dr Vanlalthlana chuan MZP leh MSU-te hian zirna hmasawnna tur leh ramin a thatpui theih nan theihtawpa hma an la thin chu lawmawm a tih thu leh, tha taka thawk ho zel turah a ngaih thu a sawi bawk.