Central Trade Union-in sorkar laipui hmalak mekna duh loha nawrh huaihawt a tum leh regional rural bank-in anmahni kaihhnawiha thil phut an neih tih hlawhtlinna atana ram puma nawrh huaihawt tum chu Mizoram Rural Bank pawhin a zawm dawn a. Vawiin hian Mizoram pumah MRB branch zawng zawng khar a ni ang.
Central Trade Union hian sorkar laipuiin ‘Labour Code’ a siam chu an dodal a, hei hi regional rural bank (RRB) ho chuan an thlawp ve dawn a. MRB hi RRB hnuaia mi a ni.
RRB thil phut hi Initial Public Offerings (IPO) kalpui tum hnuhdawh an duh a, RRB privatise tumna an duh lo. India ram state 28-a RRB chu apex body – National Rural Bank of India hnuaia dahkhawm; RRB-a hnaruak hnawhkhah a, SC/ST, OBC, hmeichhia, Persons with Disability (PwD) leh ex-servicemen tana kawng hawng zau zawnga thalai hna zawng mek tan hna 30,000 chuang siamsak dan ngaihtuah; RRB-a casual/part time leh daily-a thawkte dahngheh; Old Pension Scheme kalpui leh tih te a tel a ni.
MRB an inkhar dawn bakah MRB Head Office, MINECO kawtah City Area Branch bik chu an thil phut aupui turin an pungkhawm dawn a ni.